İnsanlara bir yenilik təklif edildikdə çox vaxt həmin yeniliyin dadını çıxarmaq və ya ən azından bir dəfə də olsa test edilməsinə can atırlar. Lakin bəzən bu yeniliklər o qədər ağılasığmaz sahələrə aid olur ki, yeniliklərin özünü test etmək qəribə nəticələr doğurur. Məşhur TechRax YouTube kanalı da məhz bu qəribəlikləri həyata keçirməklə tanınır. Tesla Model 3 markalı avtomobilin ekranını çəkiclə sındıran, avtomobil təkərinə iPhone 12 bağlayaraq sürsək nə olar testi və.s aparan bloq bu dəfə də iPhone 14 Pro modelində qəza aşkarlanması sistemini maraqlı bir üsulla sınayıb. Keçirilən sınaqdan iPhone 14 Pro modeli uğurla ayrılıb.
iPhone 14 seriyasının qəza aşkarlanması sisteminin testi üçün xüsusi bir avtomobil hazırlanıb
Apple şirkəti iPhone 14 seriyası ilə birlikdə xüsusi qəza aşkarlanması sistemini anons etmişdi. Qəza təhlükəsizliyi xüsusiyyəti üçün yeni nəsil smartfonlara akselerometr və 3 oxlu giroskop quraşdırılıb ki, cihaz 256G qüvvəsinə qədər qəzanı təyin edə bilər. TechRax YouTube kanalı da məhz bunun həqiqətən işləyib-işləmədiyini test etmək qərarı alıb.
ilk olaraq iPhone 14 Pro modelini sürücü oturacağına yapışqan bantla bərkidib. Qəzanı simulyasiya etmək üçün isə xüsusi bir avtomobil alınaraq uzaqdan idarə edilə biləcək formada hazırlanıb. Açıq düzlük ərazidə tam təhlükəsiz formada tullantı avtomobillərlə real avtomobil bir neçə dəfə toqquşdurulub və iPhone 14 Pro modeli həqiqətən bu sınaqdan uğurla ayrılıb. iPhone 14 seriyasında qəza aşkarlanmasının necə işlədiyini isə əyani olaraq görmək mümkün olub.
Smartfon toqquşmadan 10-15 saniyə keçdikdən sonra qəza aşkarlanması sistemini işə salır. İstifadəçinin isə təhlükəsizlik zəngini ləğv etmək üçün əlavə 10 saniyə vaxtı var. Həmin 10 saniyə ərzində yüksək səs çıxaran smartfonunuzda zəngi ləğv etmək üçün müdaxilə etməsəniz, smartfon lazımi fövqaladə zəngi həyata keçirir. Həmin video ilə daha ətraflı aşağıdan tanış ola bilərsiniz.
