Ötən aylarda Çində təqdim edilən Huawei P60 seriyası bu gün qlobal bazarda təqdim edilib. Belə ki, 2 illik aradan sonra 3 fərqli modellə Çin bazarına çıxan seriya, qlobal bazarda sadəcə P60 Pro modeli ilə debüt edib. Xatırladaq ki, P60 seriyası Çində Huawei P60, P60 Pro və P60 Art modelləri ilə təqdim edilmişdi. Texniki baxımdan isə qlobal bazarda təqdim edilən P60 Pro modelinin Çin bazarında təqdim edilən versiyası ilə demək olar heç bir fərqi yoxdur.
Huawei P60 Pro hansı xüsusiyyətlərə sahibdir?
Huawei P60 Pro qlobal bazarda sadəcə 2 versiyada təqdim olunur. Bu versiyalar müvafiq olaraq 8-256GB və 12-512GB yaddaş versiyalarıdır. Həmçinin yeni P60 Pro modeli 6.67 düymlük LTPO OLED ekran panelinə malikdir. BOE istehsalı 1.7K təsvir ölçülü 1-120Hz adaptiv tezlikli ekran paneli Huawei şirkətinin Kunlun adlı qoruyucu şüşəsi ilə zərbələrə qarşı olduqca dayanıqlıdır. Ekran 4 tərəfdən 360 dərəcəlik “şəlalə” konseptinə uyğun olaraq aqressiv qıvrımlara malikdir. Ekran çərçivə nisbəti ideal səviyyədədir və gözə xoş xitab edir. Ekranın PWM tezliyi isə 2160Hz təşkil edir. Kamera cəhətdən isə smartfon 48MP RYYB kamera sensoru ilə təchiz edilib. Həmçinin P60 Pro modeli 13 MP ultra-geniş bucaqlı kamera və 48MP kamera sensorundan güc alan telefoto obyektivi ilə təchiz edilib.
Qeyd edək ki, Huawei P60 Pro modelinin qlobal variantı Snapdragon 8+ Gen 1 çipsetinin 4G dəstəkli variantı ilə təchiz edilib. Batareya cəhətdən isə smartfon 88 vatt naqilli və 50 vatt naqilsiz şarj dəstəkləyən 4815 mAs həcmli batareya ilə təchiz edilib. Xatırladaq ki, smartfonun çində təqdim edilən variantı 5100 mAs həcmli batareyaya malik idi. Yeni P60 Pro modelinin qlobal variantı 1200 avro başlanğıc qiyməti ilə təklif olunur. Smartfonun daha üstün versiyası isə 1400 avroya təklif edilir. Xatırladaq ki, smartfonun Çin variantı 1023$ başlağıc qiyməti ilə təklif olunurdu.
