Samsung brendinin gələn ay təqdim edəcəyi yeni Galaxy Z Fold 5 və Z Flip 5 modellərinin rəsmi görüntüləri sızdırılıb. Daha əvvəl yeni modellərin təqdimat tarixinin təsdiqləndiyini və bəzi detallarının ortaya çıxdığını xəbər vermişdik. İndi isə 27 iyul tarixində Seulda təqdim ediləcək smartfonların ilk rəsmi görüntüləri ortaya çıxıb. MySmartPrice mənbəsinin sızdırdığı görüntülərə əsasən demək olar ki, yeni modellər sələflərinə çox oxşayacaq. Lakin bununla belə bəzi dizayn dəyişikliklərini görmək mümkündür.
Ortaya çıxan görüntülərdə S-Pen görünsə də, bu məhsul cizahla biryerdə satılmayacaq və onu ayrıca olaraq əldə etmək mümkün olacaq. Qeyd edək ki, Galaxy Z seriyasının rəsmi görüntüləri elə daha əvvəl insayderlərin sızdırığı və ya xəbər verindiyi görüntülərə çox oxşayır. Bundan əlavə insayderlər yeni Galaxy Z Flip 5 modelinin 6.7 düymlük 120 Hz yeniləmə tezliyinə malik Full HD təsvir ölçülü daxili ekran ilə təchiz ediləcəyini iddia edir. Bundan əlavə smartfonun xarici ekranı 3.4 düym ölçüsündə AMOLED keyfiyyətində ola bilər. Prosessor tərəfində isə smartfon Snapdragon 8 Gen 2 ilə təchiz ediləcək. Həmçinin smartfon 25 Vatt sürətli şarj dəstəkləyən 3700 mAs batareya həcminə sahib olacaq.
Yeni Galaxy Z Fold 5 modelinin isə 7.6 düymlük QHD+ təsvir ölçülü daxili ekran və 5.2 düymlük FHD+ təsvir ölçülü xarici ekran panelləri ilə təchiz ediləcəyi gözlənilir. Həmçinin öz gücünü Snapdragon 8 Gen 2 prosessorundan alması gözlənilən model 45 Vatt sürətli şarj dəstəkləyən 4500 mAs batareya həcminə sahib olacaq. Smarfonun digər xüsusiyyətləri isə Cənubi Koreyada keçiriləcək təqdimat tədbirində elan ediləcək.
