Samsung brendi yeni Galaxy Z modellərini təqdim edəcəyi Galaxy Unpacked tədbirinin tarixini təsdiqləyib. Belə ki, insayderlər bir neçə müddətdir ki, yeni qatlanan modellərin məhz iyul ayında təqdim ediləcəyini iddia edirdi. Bu gün isə texnologiya nəhəngi iddiaları təsdiqləyib və 27 iyul tarixində tədbirin keçiriləcəyini açıqlayıb. Maraqlısı budur ki, Galaxy Unpacked tədbiri ilk dəfə olaraq Cənubi Koreyada keçiriləcək. Gələn ay keçiriləcək tədbirdə Galaxy Z modelləri təqdim edilməli olsa da, artıq Galaxy Z Flip 5 və Z Fold 5 modellərinin yeni xüsusiyyətləri ortaya çıxıb.
Qeyd edək ki, Samsung adətən flaqman modellərinin təqdimatını Barselona, San-Fransisko, Nyu-York kimi iri şəhərlərdə keçirirdi. Bu dəfə isə yeni Galaxy Z modellərinin xüsusiyyətləri Cənubi Koreyanın Seul şəhərində açıqlanacaq. Lakin yeni Z Flip 5 barədə məlumatlar ortaya çıxıb. Belə ki, insayderlər yeni Galaxy Z Flip 5 modelinin 6.7 düymlük 120 Hz yeniləmə tezliyinə malik Full HD təsvir ölçülü daxili ekran ilə təchiz ediləcəyini iddia edir. Bundan əlavə smartfonun xarici ekranı 3.4 düym ölçüsündə AMOLED keyfiyyətində ola bilər. Prosessor tərəfində isə smartfon Snapdragon 8 Gen 2 ilə təchiz ediləcək.
Galaxy Z Flip 5 smartfonu 8-128GB və 8-256GB yaddaş seçimləri ilə təklif edilə bilər. 2 ədəf 12 MP arxa kamera ilə təchiz edilməsi gözlənilən smartfon 3700 mAs batareya həcminə sahib olacaq. 25 Vatt sürətli şarj dəstəkləyən Galaxy Z Flip 5 modelinin digər xüsusiyyətləri barədə hələlik iddia yoxdur.
