Samsung-un Galaxy S26 ailəsinə ilin ikinci yarısında əlavə etməyə hazırlaşdığı Galaxy S26 FE modeli haqqında yeni texniki məlumatlar ortaya çıxıb. Sızdırılan məlumatlara əsasən, şirkət FE seriyasında ənənəvi strategiyasını davam etdirərək əvvəlki nəsil flaqman komponentlərini Galaxy S26 seriyasının daha yeni dizaynı ilə birləşdirəcək. Telefonun qrafit, açıq yaşıl və açıq mavi olmaqla üç rəngdə satışa çıxarılacağı bildirilir.
WinFuture-in əldə etdiyi məlumatlara görə, Galaxy S26 FE 6,7 düymlük Dynamic AMOLED 2X ekranla təchiz ediləcək. Panel 2340 × 1080 piksel təsvir ölçüsü və 120 Hz-ə qədər yenilənmə tezliyi təklif edəcək. Ekranın standart rejimdə maksimum parlaqlığının təxminən 1200 nit, yüksək parlaqlıq rejimində isə 1900 nitə qədər çatacağı qeyd olunur.
Smartfonun əsasını Samsung-un əvvəlki nəsil flaqman prosessoru Exynos 2500 təşkil edəcək. On nüvəli prosessorun maksimum takt tezliyi 3,3 GHz olacaq. Cihazın 8 GB operativ yaddaşla təchiz ediləcəyi, daxili yaddaş üçün isə 128 GB və 256 GB variantlarının təklif olunacağı bildirilir.
Galaxy S26 FE-nin arxa hissəsində üçlü kamera sistemi yerləşəcək. Əsas kamera 50 meqapiksellik sensor, f/1.8 diafraqma və optik görüntü sabitləşdirmə – OIS dəstəyi ilə gələcək. Ona f/2.2 diafraqmalı ultra genişbucaqlı kamera və 3 qat optik yaxınlaşdırma imkanına malik 8 meqapiksellik telefoto kamera qoşulacaq. Telefoto kameranın f/2.4 diafraqmaya sahib olacağı gözlənilir.
Ön tərəfdə isə f/2.2 diafraqmalı 12 meqapiksellik selfi kamerası yerləşəcək. Məlumata görə, ön kamera avtofokus funksiyasını dəstəkləməyəcək. Arxa kamera sistemi ilə 30 FPS-də 8K, həmçinin 60 FPS-ə qədər 4K video çəkmək mümkün olacaq.
Bağlantı imkanları arasında Bluetooth 5.4, Wi-Fi 6 və NFC yer alacaq. Cihaz iki Nano-SIM kartını dəstəkləməklə yanaşı, eSIM-dən istifadə imkanı da təqdim edəcək. IP68 sertifikatı isə smartfonun suya və toza qarşı davamlılığını təmin edəcək.
Sızdırılan məlumatlara əsasən, Galaxy S26 FE 4900 mAh tutumlu batareya ilə təchiz olunacaq və 45 Vt sürətli şarjı dəstəkləyəcək. Samsung-un təqdim etdiyi göstəricilərə əsaslanan məlumatlarda batareyanın müəyyən istifadə ssenarilərində 50 saata qədər işləyə biləcəyi qeyd olunur.
Batareyanın Avropa İttifaqının EPREL qiymətləndirməsinə əsasən 1200 şarj dövrü üçün nəzərdə tutulduğu bildirilir. Bu göstərici Samsung-un bəzi əvvəlki modellərindən aşağıdır. Bununla yanaşı, Galaxy S26 FE-də silikon-karbon batareya texnologiyasından istifadə edilə biləcəyi də iddia olunur.
Galaxy S26 FE-nin korpusunun cəmi 7,4 mm qalınlığında, çəkisinin isə 193 qram olacağı gözlənilir. Proqram təminatı baxımından smartfonun qutudan Android 17 əməliyyat sistemi və Samsung-un One UI interfeysi ilə çıxacağı bildirilir.
Hələlik Samsung Galaxy S26 FE-ni rəsmi şəkildə təqdim etmədiyindən bu xüsusiyyətlər təsdiqlənmiş məlumat hesab edilmir. Sızmaya görə, cihazın Avropada tövsiyə olunan satış qiyməti 799 avro ola bilər.
