CES2025-də önə çıxan bir digər teexnologiyalardan biri də şin istehsalçısı Goodyear-dan gəlir. Belə ki, Goodyear Las-Veqasda keçirilən CES 2025 ticarət sərgisində Hollandiyada yerləşən TNO tədqiqat təşkilatı ilə birlikdə hazırladığı SightLine adlı ağıllı təkər texnologiyasını təqdim edib. Goodyear tərəfindən hazırlanan bu ağıllı təkərlər yağışlı və buzlu yolları müəyyən edə bilir.
2029-cu ilə qədər satılan bütün avtomobillərin avtomatik təcili əyləc (AEB) olması tələb olunacaq, lakin mövcud texnologiyalar, xüsusən də əlverişsiz hava şəraitində qeyri-adekvatdır. Goodyear məhz bu problemi həll etmək üçün inqilabi addım atır. Bu yeni texnologiya, yağış, qar və buz kimi çətin yol şəraitini aşkar edən və avtomobilin avtomatik əyləc sisteminin erkən reaksiya verməsi üçün lazımi məlumatları təmin edən sensorlarla təchiz olunub. Goodyear-ın açıqlamasına görə, bu təkərlər sayəsində nəqliyyat vasitələri təhlükəli vəziyyətlərdə daha tez əyləci sıxa biləcəklər. Bu isə öz növbəsində toqquşma riskini əhəmiyyətli dərəcədə azaldacaq.
SightLine texnologiyası 80 km/saata qədər sürətlə effektiv işləyə bilir və hətta aşağı sürtünməli səthlərdə belə təhlükəsiz əyləc məsafələrini təmin edir. Goodyear 2021-ci ildə təqdim etdiyi ağıllı təkər konseptini bir addım irəli apararaq, təkərlərin hava təzyiqini və aşınma sürətini ölçməklə yanaşı, sürtünmə miqdarını da təhlil etdiyini bildirib. Bu məlumat həm sürücülərin, həm də digər hərəkət iştirakçılarının təhlükəsizliyini artıraraq AEB sisteminə inteqrasiya olunacaq. İstehlakçılara təqdim olunma tarixi hələ məlum olmayan bu təkərlər hələlik sadəcə konsept olaraq qalır. Goodyear-ın sözçüsü Caitlyn Duran, yeniliyin “texnologiyanın potensialını nümayiş etdirmək üçün nəzərdə tutulduğunu” və hazırda kommersiya məhsulu olmadığını bildirib.
