Huawei şirkətinin Apple iMac modelinə rəqib olaraq hazırladığı yenilənmiş Huawei MateStation X modeli debüt edib. Olduqca mükəmməl dizaynı ilə fərqlənən MateStation X modeli adətən, oturub kənardan gözəlliyinə tamaşa etmək üçün hazırlanıb. 28,2 düymlük nəhəng ekranın kənar çərçivələri o qədər nazikdir ki, ekran-gövdə nisbəti sadəcə 92%-dir. Ekranı ayaqda saxlayan “dirək” üzərindəki detallar isə ayrı diqqət çəkir. 90 dərəcə bucaq altında uzanan nazik dirəyin aşağı hissəsində ön tərəfə baxacaq şəkildə səs ucaldanlar, kənarlarında isə müxtəlif portlar və güc düyməsi yer alır. Görüntüləri sizinlə baş-başa qoyaraq gəlin biraz da kompüterin xüsusiyyətlərin bəhs edək.
Huawei MateStation X modelinin texniki xüsusiyyətləri
İlk olaraq monoblokun ekranından danışaraq başlayaq. Huawei şirkəti bu modelə 28,2 düymlük 4K təsvir ölçülü 60Hz tezlikli LCD ekran quraşdırıb. MateStation X modelini fərqləndirən ən əsas cəhət ekranın tamamilə sensor dəstəyinə malik olmasıdır. 10 ədədə qədər çoxlu toxunmanı dəstəkləyən bu ekran, eyni zamanda barmaq izi saxlamayan xüsusi örtüklə örtülüb. Monoblokun ekranının rəng dəqiqliyi ΔE≤ 1 səviyyəsində sazlanıb ki, olduqca yüksək doğruluqda görüntüləri göstərə bilir. HDR400 və TÜV Rheinland mavi işıq sertifikatına da malikdir.
Huawei MateStation X modeli öz gücünü Intel Core i9-12900H prosessorundan alır. Bu prosessor monoblokun performansı əhəmiyyətli dərəcədə artırır. Əlavə olaraq 5200MHz tezlikli 16 GB LPDDR5 operativ yaddaşa və 1 TB PCIe SSD yaddaş həllinə malikdir. Xarici ekran kartı isə monobloka quraşdırılmadığından, maksimum performanslı Intel Iris Xe Graphics G7 96EU daxili ekran kartından istifadə edilir.
Windows əməliyyat sistemi üzərinə Harmony əsaslı cihazlarla inteqrasiya yaradan proqram təminatına sahib monoblok smartfonunuzla Apple iMac modelindəki kimi yaxından əlaqə yarada bilir. Məsələn, monoblok üzərindəki 1080P kamera əvəzinə smartfonun kamerasından veb-kamera kimi istifadə etmək və.s mümkündür. Yəni smartfon adətən kompüterin bir parçası kimi işləyə bilir.
Monoblokla birlikdə erqonomik naqilsiz klaviatura və siçan da qutudan çıxır. Hər biri Type-C ilə şarj olmağı bacarır. Əlavə olaraq qeyd edək ki, Huawei MateStation X modelində Thunderbolt 4 dəstəyi və biometrik təhlükəsizlik üçün barmaq izi skaneri dəstəyi klaviatura ilə birlikdə mövcuddur. Modelin qiymətinə gəldikdə 512GB yaddaş variantı 1650$ təşkil edir. 1TB yaddaş variantı üçün isə 1785$ ödəməlisiniz.
