Xiaomi-nin Apple avadanlıqlarına dəstək gətirməyi planlaşdırdığı iddi edilib. Beləliklə, Xiaomi öz smartfonlarına Apple Watch dəstəyi gətirməyi planlaşdırır, artıq iPhone almağa ehtiyac qalmayacaq.
Apple-ın “Apple Watch” saatları, şübhəsiz ki, bazarda bu sahədə ən uğurlu cihazlardan biri hesab olunur. Bununla belə, Apple Watch modelləri Android smartfonları ilə işləmirdi. Məhz bu saatdan istifadə edə bilmək üçün sizə iPhone lazım idi. Yeni ortaya çıxan məlumatlar isə bu vəziyyətin tezliklə dəyişə biləcəyini ortaya çıxarıb. Etibarlı mənbə hesab olunan Digital Chat Station-a görə, Xiaomi smartfonlarına Apple Watch dəstəyi gətirə bilər. Digital Chat Station tərəfindən edilən iddiaya görə, Çin texnologiya nəhənginin smartfonlarına nəinki Apple Watch, həm də AirPods və HomePod kimi Apple cihazları ilə tam uyğunlaşacaq xüsusiyyətlər gətiriləcək.
Bu, xüsusilə Apple Watch üçün inqilabi dəyişiklik ola bilər. Bu tərzdə dəstəyin Xiaomi telefonlarına necə və nə vaxt əlavə ediləcəyi barədə məlumat yoxdur. Bununla belə, proqnozlara görə, şirkət buna ya artıq mövcud olan, ya da tamamilə yeni tətbiq vasitəsilə nail ola bilər. Qeyd edək ki, hələlik bu xəbər sadəcə iddia olaraq qalır. Bunun doğru olub-olmadığına gələcəkdə birlikdə şahid olacağıq.
