Xiaomi şirkəti ötən gün bəzi cihazlarla yanaşı yeni nəsil Pad 6 və Pad 6 Pro planşet seriyasının da təqdim etdi. Pad 6 və 6 Pro hər ikisi 2880×1800 piksel təsvir ölçülü 11 düymlük LCD ekranlarla gəlir. Ekran olduqca yüksək 144Hz yeniləmə tezliyini, P3 rəng qamutunu, 10 bit rəng dərinliyini, HDR10 və Dolby Vision-u dəstəkləyir. Həmçinin, ətraf mühitin rəng temperaturu aşkar edə bilən texnologiya ilədə təhciz olunub. Hansı ki, bu da parlaqlıq və rəng temperaturunun ətraf işığın intensivliyinə əsasən avtomatik tənzimlənməsi deməkdir. Planşetlərin çəkisi 490 q, qalınlığı 6,51 mm-dir. Həm Xiaomi Pad 6, həm də Pad 6 Pro qara, qızılı və dağ mavi rənglərində mövcuddur.
Çipset və kamera konfiqurasiyası iki planşetin fərqləndiyi yerdir. Xiaomi Pad 6 Pro flaqman Qualcomm Snapdragon 8+ Gen 1 çipsetindən istifadə edir. Pad 6 Pro modelində ikili kamera quruluşunda 2MP dərinlik sensoru ilə birlikdə 50MP əsas kamera işlədilir. Ön tərəfdə selfilər və video zənglər üçün 20MP kamera mövcuddur. Pad 6 Pro modeli 62 dəqiqə ərzində 0-100% doldura bilən 67 Vatt sürətli şarj dəstəyi ilə 8600 mAs batareyaya sahibdir. Flaqman planşet həmçinin barmaq izi, üz ilə kilidini və Wi-Fi 6 bağlantısının təkmilləşdirilmiş versiyasını dəstəkləyir.
Xiaomi Pad 6 isə Snapdragon 870 çipseti ilə təhciz olunub. Arxa tərəfdə 13MP tək kamera var. Ön tərəfdə selfilər və video zənglər üçün 8MP kamera mövcuddur. Pad 6, modeli 99 dəqiqə ərzində 0-100% doldura bilən 33 Vatt sürətli şarj dəstəyi ilə 8400 mAs batareyaya sahibdir. Pad 6 üz kilid texnologiyasına və Wi-Fi 6 dəstəyinə malikdir. İki planşet də LPDDR5 RAM və UFS 3.1 yaddaş texnologiyaları ilə təchiz edilmişdir. Həmçinin iki cihaz dörd dinamik, Dolby Atmos dəstəyi və USB 3.2 Gen 1 interfeysi ilə təhciz olunub. Cihazlar Android 13-ə əsaslanan MIUI Pad 14 ƏS-də gələcək.
Xiaomi Pad 6 seriyasının qiymət siyahsı
Pad 6 modelinin 6-128GB başlanğıc variantı 290 dollar (493AZN), Pad 6 Pro modelinin 8-128GB variantı 363 dollar (617AZN) səviyyələrindədir. Uyğun olaraq seriya daxilində ən bahalı model 12-256GB yaddaş variantı ilə 494 dollara (840 manat) təklif olunur. Bu qiymətlər isə hələlik, yalnız Çində keçərlidir.
