Ötən gün paylaşdığımız məlumatda Xiaomi şirkətinin Çində təqdim etdiyi Redmi Note 12 seriyası smartfonlarından ətraflı bəhs etdik. Lakin təqdimatın digər bir diqqət çəkən məhsulu Xiaomi Book Air 13 noutbuku idi. Bu model şirkətin ən yığcam və yüngül noutbuku hesab olunur. Yeni noutbukun ən önəmli xüsusiyyəti isə planşet kimi istifadə oluna bilməsidir.
Xiaomi Book Air 13 noutbukunun təqdim olunmuş xüsusiyyətləri?
Yeni təqdim olunmuş noutbukun xüsusiyyətləri bir neçə gün əvvəl paylaşdığımız sızıntılardan heç cür fərqlənmir. 2880×1800 piksel təsvir ölçüsünə 13,3 düymlük OLED sensor ekranla noutbuk qarşımıza çıxır. Sensor ekran ilə təchiz olunduğuna görə noutbuk həmçinin planşet kimi istifadə edilə bilir. Çəkisi sadəcə 1,2kq olub və ekran da tərsinə qatlana bildiyi üçün normal bir planşet hissiyatını rahatlıqla yaşada bilir. Ekranın tək mənfi cəhəti isə 60Hz ekran tezliyinə sahib olmasıdır ki, bunu da OLED ekrana görə bağışlamaq olar. Eyni zamanda smartfonlar kimi Gorilla Glass 3 şüşəsi, Dolby Vision dəstəyinə, HDR 500 sertifikatına, P3 rəng qamutu dəstəyinə, DC-Dimming (aşağı tezlikli titrəmə ilə daha az göz yorğunluğu) tipli vacib elementləri də bu ekran özündə birləşdirir. Əlavə olaraq noutbuk 8MP veb-kamera ilə təchiz olunub. Həmçinin biometrik səviyyədə barmaq izi skaneri ilə də təchiz olunub. Bu skaner isə güc düyməsinin üzərinə quraşdırılıb.
Xiaomi şirkətinin yeni ultranazik noutbuku texnixi cəhətdən də güclü parametrlərə sahibdir. Belə ki, noutbuk Intel istehsalı ən son, 12-ci nəsil prosessorları ilə təchiz olunub. Noutbukun standart versiyası Intel Core i5-1230U 4,4 GHz və daha yüksək versiyası isə Intel Core i7-1250U 4,7 GHz prosessoru ilə gəlməkdədir. Noutbukun hər iki versiyası 16 GB LPDDR5 RAM və 512 GB SSD ilə standart olaraq təmin olunur. Xiaomi Book Air 13 modelinə 58.3 Wh həcmli batareya quraşdırılıb və noutbuk 60 Vatt adapter dəstəkləyir. Üstəlik Type-C ilə şarj olduğu üçün smartfonlarınızın adapterini üzərinizdə gəzdirmək kifayət edir.
Əlavə olaraq 12 mm qalınlığa və 1.2 kq ağırlığa malik noutbukda 3.5mm qulaqlıq girişi mövcud olsa da, gövdə çox nazik olduğu üçün Type-C xaricində giriş yeri şəkillərdən gördüyümüz qədərilə mövcud deyi. İlkin sifariş zamanı noutbukun standart versiyasının qiyməti 690 dollar, güclü versiyasının qiyməti isə 775 dollardır.
