Bildiyimiz kimi, Çin smartfon nəhəngi ötən günlərdə beynəlxalq və yerli bazarda Xiaomi 15 və Xiaomi 15 Ultra modellərini təqdim etmişdi. Belə ki, Çin nəhəngi sadəcə bu modellərlə məhdudlaşmağı planlaşdırmır. Əldə edilən məlumata görə, Xiaomi hazırda Xiaomi 15S Pro modelini sınaqdan keçirir.
Qeyd edək ki, Xiaomi brendinin öz prosessoru ilə gəlməsi gözlənilən yeni smartfon böyük marağa səbəb ola bilər. Maraqlısı budur ki, cihazın proqram təminatı direktoru Kartikey Singh təsadüfən hələ satışa çıxarılmamış smartfonla çəkilmiş şəkli paylaşıb. Şəkildən ibarət paylaşım isə sonradan silinib. Bununla belə, təsvir çox məlumat ehtiva etməsə də, Xiaomi 15S Pro adlı yeni flaqman modelinin mövcudluğunu təsdiqləyir.
Şirkətdaxili məlumatlara görə, cihaz aprel ayında təqdim ediləcək. Çox güman ki, təqdimat 14 düymlük Xiaomi Pad 7 Max ilə eyni vaxtda baş tutacaq. Bundan əlavə, mənbələr Xiaomi 15S Pro-nun dizayn baxımından Xiaomi 15 Pro-ya bənzəyəcəyini bildirir. Yeni model həmçinin Xiaomi 15 Pro-dan optik xüsusiyyətləri miras alacaq. Bununla belə, cihazın ən diqqət çəkən xüsusiyyəti onun Xiaomi şirkətinin istehsal etdiyi ən son prosessorla təchiz olunmasıdır. Bu prosessorun isə XRING adlandırılacağı gözlənilir.
