Çin şirkətləri ən son təqdim etdiyi smartfonlarına peyk rabitəsi funksiyalarını əlavə etməyə davam edir. Əvvəllər OPPO, HUAWEI və HONOR-un belə seçimləri mövcud olsa da indi siyahıya Xiaomi də əlavə edilib. Beləliklə, Xiaomi brendinin yeni flaqmanı Xiaomi 15 Ultra peyk rabitəsi funksiyası ilə təqdim edilə bilər.
Ən son sızan məlumata görə, qarşıdan gələn Xiaomi 15 Ultra flaqmanı peyk rabitəsindən istifadə edərək zəng etmək imkanına sahib olacaq və bu xüsusiyyət standart versiyasında da təklif olunacaq. Qeyd edək ki, bu məlumat şirkətin Çinin Sənaye və İnformasiya Texnologiyaları Nazirliyinə təqdim etdiyi patentdə yer alıb. Digər tərəfdən onu da qeyd edək ki, smartfonun 2025-ci ilin fevralında satışa çıxarılması ehtimalı var. Beləliklə, şirkət OPPO Find X8 Ultra və Vivo X200 Ultra kimi əsas rəqiblərini qabaqlamağı hədəfləyir. Məhz bunun üçün də smartfonda peyk rabitəsi kimi xüsusiyyətlər daxil olmaqla bir sıra yeniliklər mövcud olacaq.
Habelə, Xiaomi 15 Ultra modelinin Qualcomm Snapdragon 8 Elite flaqman prosessoruna sahib olacağı gözlənilir. Dizayn tərəfində isə Xiaomi 15 Ultra sələfi Xiaomi 14 Ultra ilə oxşar dizayna sahib olacaq. Mənbənin sözlərinə görə isə, smartfonda Leica tərəfindən hazırlanmış daha təkmil linzalar yer alacaq ki, bu da onu ən yaxşı kameralı telefonlardan birinə çevirəcək. Smartfon ilk olaraq Çində daha sonra isə Qlobal bazarda təqdim edilə bilər.
