Çinli texnologiya nəhəngi Xiaomi-nin yeni təqdim edəcəyi Xiaomi 15 Ultra flaqman modeli barəsində iddialar ortaya çıxıb. Belə ki, analitiklər yeni Xiaomi 15 Ultra modelinin ikiqat OLED ekran texnologiyasına sahib olacağını iddia edirlər. Buna uyğun olaraq isə, smartfon daha çox parlaqlıq təqdim edəcək.
Beləliklə, yeni Xiaomi 15 seriyasının ən yüksək səviyyəli modeli olan Xiaomi 15 Ultra 2K təsvir ölçülü ikiqat OLED ekran ilə gələ bilər. Bir çox iddiaları ilə məşhurlaşan Smart Pikachu istifadəçisi, bu dəfə Çinli texnologiya nəhənginin flaqman modeli barədə iddialar irəli sürüb. Qeyd edək ki, yeni flaqman smartfonun 24GB-a qədər RAM versiyalarına sahib olacağı və təxminən 6000 mAs batareya ilə təchiz olunacağı bildirilir. Məhz bu qədər böyük həcmli batareya səbəbindən smartfon sələfindən fərqli olaraq nazik və yüngül olmayacaq. Hazırda, Xiaomi 14 Ultra modelinin qalınlığı 9,2 mm, çəkisi isə 229,5 qramdır.
Qualcomm-un tezliklə təqdim edəcəyi Snapdragon 8 Gen 4 çipsetindən istifadə etməsi gözlənilən Xiaomi 15 və Xiaomi 15 Pro, ötən il olduğu kimi Ultra seriyasından əvvəl oktyabr və ya noyabr aylarında təqdim ediləcək. Eyni çipsetdən güc alacaq Xiaomi 15 Ultra modeli ilə 2025-ci ilin birinci rübündə təqdim ediləcək. Hələlik, Ultra seriyasını xüsusi edən kamera konfiqurasiyası tərəfində isə heç bir məlumat verilməyib. Lakin yenə də, flaqman modelin kamera tərəfində sələfini qabaqlaması gözlənilir.
