Tezliklə Çində təqdim ediləcək Xiaomi 15 seriyası daha yüksək parlaqlıq və daha yaxşı rəng reproduksiyası təklif edən OLED panel ilə gələcək. Belə ki, TCL-nin yeni paneli olan Huaxing C9-un seriyada ilk olaraq istifadə ediləcəyi gözlənilir.
Daha əvvəl yeni Xiaomi smartfonlarının TCL panellərindən istifadə edəcəyi ilə bağlı iddialar mövcud idi. İndi isə TCL Huaxing rəsmi WeChat hesabında Huaxing C9 displey panelinin tezliklə buraxılacağını elan edib. Sənaye mənbələrinə görə, TCL Huaxing C9 luminescent materialı ilə daha yaxşı rəng reproduksiyası və daha yüksək parlaqlıq səviyyəsinə nail ola bilib. TCL, C9 ekran paneli üçün ilk müştərisini açıqlamasa da, Xiaomi 13 və Xiaomi 14 seriyalarının müvafiq olaraq TCL-nin C7 və C8 panelləri ilə satışa çıxarıldığını nəzərə alsaq, Xiaomi 15 seriyası yeni C9 panellərini təqdim edən ilk şirkət ola bilər.
İddialara görə, Xiaomi 15 və Xiaomi 15 Pro-nun ekranları keçən il olduğu kimi müvafiq olaraq 1,5K və 2K təsvir ölçüsünə malik olacaq. Həmçinin, hər iki modelin sələfləri ilə oxşar ekran ölçüləri ilə gələcəyi və beləliklə 460ppi və 520ppi piksel sıxlığı ilə aydın və canlı vizual təcrübə təqdim ediləcəyi bildirilir. Qualcomm-un Snapdragon 8 Elite prosessoru ilə təchiz ediləcək Xiaomi 15 seriyası daha böyük əsas kamera sensoru, telefoto makro, ultrasəs displeydə barmaq izi oxuyucusu, şüşə korpus, silikon anod batareyaları, simsiz sürətli şarj və IP68 kimi hərtərəfli təkmilləşdirmələr təqdim edəcək. Smarftfonların Çində 23 Oktyabrda təqdim edilməsi gözlənilir.
