Bir müddətdir gündəmdən düşməyən Xiaomi 13 seriyasının Pro modelinə aid canlı görüntülər bir çinli bloqer tərəfindən paylaşılmışdı. Belə ki, mydrivers resursu tərəfindən verilən məlumata görə 8 milyona yaxın pərəstişkarı olan avtomobil bloqeri Chen Zhe öz sosial şəbəkəsində yeni flaqman smartfonun canlı görüntüsünü paylaşıb. Bu hadisədən xəbər tutan Xiaomi şirkəti həmin şəxsin cəzalandırılacağını bildirib.
Bir neçə gün əvvəl Chen Zhe Xiaomi şirkətinin ona göndərdiyi Xiaomi 13 Pro smartfonunun canlı görüntülərini paylaşıb. Bu hadisədən sonra isə Xiaomi şirkətinin İctimaiyyətlə Əlaqələr Departamentinin baş meneceri Vanq Hua Weibo sosial şəbəkəsində yeni flaqman smartfonun görüntülərini sızdıran şəxslərin qanun çərçivəsində cəzalandırıcılağını bildirib. Vanq Hua bəzi bloqerlərə yeni smartfonların göndərildiyini də etiraf edib. Buna səbəb isə təqdimatdan dərhal sonra həmin bloqerlərin icmal dərc etməli olması olub.
Ötən axşam isə 8 milyona yaxın pərəstişkarı olan avtomobil bloqeri, paylaşdığı görüntüləri silib və üzr videosunu paylaşıb. Hətta o, şirkətin tətbiq edəcəyi pul cəzasını ödəməyə hazır olduğunu da bildirib. Qeyd edək ki, şirkət flaqman smartfonun görüntülərini paylaşanların 143 min dollar cərimə ilə üzləşəcəyini bildirib.
Əlavə olaraq qeyd edək ki, şirkətin yeni modeli olan Xiaomi 13 Pro smartfonu bir neçə gündür ikinci əl smartfon bazarında belə satışa çıxarılmışdı. Lakin bloqerin smartfonun görüntüsünü paylaşması şirkəti açıqlama verməyə məcbur edib. Yeni flaqman smartfonun təqdimatının yaxın günlərdə, daha doğrusu 8 dekabrda keçiriləcəyi gözlənilir. Ötən həftə olan təqdimatı, şirkət sabiq Çin prezidentinin ölümü ilə əlaqədar təxirə salmışdı.
Eyni zamanda Xiaomi 13 və Xiaomi 13 Pro modellərinin qoburunun ölçüləri də Xiaomi 12 seriyası və iPhone 13 Pro ilə müqayisə edilib. Hər iki Xiaomi 13 seriyası smartfonun iPhone 13 Pro modelindən böyük olduğunu yuxarıdakı şəkil nəzərən söyləmək mümkündür.
