2 həftə əvvəl Barselonada baş tutan sərgidə MWC 23 sərgisində təqdim olunan Xiaomi 13 Lite modeli ötən gün rəsmi olaraq Azərbaycandakı rəsmi mağazalarda satışa çıxarıldı. Əvvəlcədən qeyd edək ki, yaxın vaxtlarda Xiaomi 13 və Xiaomi 13 Pro modellərinin də ölkəmizdə rəsmi olaraq satışa çıxarılması gözlənilir. Lakin hal-hazırda ilk olaraq qiyməti məlum olmuş Xiaomi 13 Lite modeli ilə şirkətin bu seriyası Azərbaycan bazarına daxil olmuş hesab edilir. Qısaca olaraq Xiaomi 13 Lite modelinin texniki xüsusiyyətlərini və nəyə görə fərqləndiyini xatırlasaq, ilk diqqət çəkən smartfonun dizaynı idi. Xiaomi 13 Lite modeli bir müddət əvvəl Çində təqdim olunmuş Xiaomi CIVI 2 modelinin təkrar brendləşdirilmiş variantıdır. Ona görə də orta seqmentdə premium cihazlara bənzər dizayn təklif etməsi ilə fərqlənir.
Xiaomi 13 Lite almaq sizə hansı imkanları vəd edir?
929,99 AZN başlanğıc qiyməti olan Xiaomi 13 Lite modeli 6.55 düymlük 120Hz tezlikli qıvrımlı ekran paneli alıb. Sensor tezliyi isə (barmağın ekran tərəfindən qavranılması) 240Hz təşkil edir. Təsvir ölçüsü FHD+ olan ekran paneli 1920Hz PWM qaraltma, Dolby Vision, P3 rəng qamutu və.s kimi keyfiyyət standartlarına malikdir. Ekran panelinin özü Gorilla Glass 5 ilə qorunur.
Smartfon öz gücünü Snapdragon 7 Gen 1 çipsetindən alır. Performans cəhətdən Snapdragon 778G çipseti ilə bənzər performans göstərən Snapdragon 7 Gen 1 orta-üst seqmentdə ötən il çox gördüyümüz Snapdragon 870 çipsetinin xeyli gerisində qalır. Biraz qəribə olan bir faktor da var ki, smartfon UFS 2.2 və LPDDR4x yaddaş texnologiyalarını mənimsəyir. Ən azından UFS 3.1 yaddaş çipi fikrimizcə bu cihaza daha çox yaraşardı. Göründüyü qədərilə, fərqli yerlərdə bəzi gücləndirmələr edən şirkət balansı bu detalla qorumaq qərarına gəlib.
Kamera konfiqurasiyasına gəldikdə Xiaomi 13 Lite modeli 50MP Sony IMX766 əsas, 20MP 115° ultra-geniş və 2MP makro sensorlarına malikdir. Təəssüf ki, arxa kamerada OIS və ya telefoto obyektivi kimi lazımi detallar mövcud deyil. Lakin selfi kameraları cəhətdən Xiaomi xeyli inkişaf edib. Ön tərəfdəki kapsul daxilində 2 ədəd 32MP təsvir ölçülü kamera sensoru quraşdırılıb. Avtofokus dəstəkli selfi kameralarından biri 100° geniş baxış bucağına malikdir. Şirkət eyni zamanda müxtəlif selfi kamerası üçün özəlləşdirilmiş filterlerlər, VLOG modu kimi xüsusiyyətləri də yeni cihazı ilə birlikdə təqdim edib. Ön kamera ilə maksimum 1080P keyfiyyətdə 60FPS, arxa kamera ilə standart olaraq 4K keyfiyyətdə 30FPS videolar qeydə ala bilər. Əlavə olaraq ön tərəfdə 2 ədəd LED işıq da çərçivəyə inteqrasiya edilib ki, selfi kamerası ilə görüntülərin keyfiyyəti zəif işıqda müəyyən qədər arta bilər.
Smartfon 4500 mAs həcmli 67 Vt sürətli şarj dəstəkləyən batareya ilə təchiz edilib. Həqiqi stereo səs ucaldanlar quraşdırılmayıb, lakin səs sisteminin özü Dolby Atmos dəstəyinə malikdir.
Xiaomi 13 Lite Azərbaycan qiyməti nə qədərdir?
Hal-hazırda ölkədəki yerli şəbəkə mağazalarında (Kontakt Home, İrshad) Xiaomi 13 Lite modeli 128GB başlanğıc variantı ilə nağd alışda 929,99 AZN təşkil edir. Əgər siz 256GB yaddaşa malik variantını əldə etmək istəyirsinizsə, 999 AZN ödəməlisiniz. Qiymətlər, əslində gözlənilən səviyyədə olduğundan gələcək aylarda pərakəndə satıcılardan cihazı elə sələfi Xiaomi 12 Lite ilə bənzər qiymətlərə əldə etməyin mümkün olacağı gözləniləndir. Lakin yenə də qiymətlər barədə fikirləriniz bizim üçün maraqlıdır. Fikirlərinizi sosial şəbəkə hesablarımızın rəylərində bölüşməyi unutmayın!
