MWC 2024 çərçivəsində yeniliklər elan olunmağa davam edir. Belə ki, Tecno brendi Barselona şəhərində keçirilən sərgi çərçivəsində yeni Dynamic 1 robot itini, ağıllı eynək və əl konsolunu təqdim edib. Görünən odur ki, bu il texnologiya nəhəngləri öz portfellərini xeyli genişləndirməyi qərara alıb. Gəlin indi Tecno Dynamic 1 robotundan bəhs edək.
Beləliklə, elmi-fantastik filmlərdə gördüyümüz robot itlər artıq reallaşır. Tecno Mobile şirkəti MWC çərçisində ilk Dynamic 1 adlı robot itini təqdim edib. Alman çoban itinə bənzər dizayna sahib olan bu robot real iti təqlid edə bilir. Ümumiyyətlə Tecno bu robot iti “gələcəyin mükəmməl ev heyvanına bənzər yoldaşı” olaraq adlandırır. Texniki tərəfə gəldikdə isə, Dynamic 1 45 nm fırlanma anı hasil edən mühərrikə sahibdir. Bu isə itin rahatlıqla pilləkənləri qalxa bilməsini mümkün edir. AI HyperSense Fusion System və Intel Real Sense D430 dərinlik kamerası onun balanslaşdırılmış hərəkətliliyinə diqqət yetirir, maneələri tanımağa və onların ətrafında hərəkət etməyə imkan verir. Onu da qeyd edək ki, robot 8 nüvəli ARM çipsetinə sahibdir.
64GB yaddaşa, Wi-Fi 6 və Bluetooth 5.2 texnologiyasına sahib olan Dynamic 1 robot itini smartfon ilə idarə etmək mümkündür. Dynamic 1, 90 dəqiqə işləmə müddətini təmin edən 15.000 mAh batareyaya malikdir və batareyasını sadəcə bir neçə dəqiqə ərzində yenisi ilə əvəzləmək mümkündür. Qeyd edək ki, Tecno Dynamic 1 ilə Boston Dynamics məhsullarına rəqib olmaq niyyətində deyil. Hətta bu modelin kommersiyalaşdırılması da mümkün deyil. Tecno sərgidə Dynamic 1 modelini təqdim etməklə sadəcə şirkətin robototexnika və süni intellekt sahəsində innovasiya imkanlarını nümayiş etdirir.
