Xiaomi çətiri altında olan Black Shark törəmə şirkəti hazırladığı ilk ağıllı üzük barədə təqdimat şəkilləri yayımlayıb. Görünən odur ki, Samsung brendindən sonra Xiaomi də üzük üçün işə başlayıb. Təqdimat şəkillərində Black Shark şirkətinin ilk ağıllı üzüyünün uzun müddətli batareya ömrünə sahib olması diqqət çəkib. Qeyd edək ki, Black Shark nə az nə çox 180 günlük batareya ömrü vəd edir.
Samsung şirkətinin uzun müddətdir üzərində işlədiyi Galaxy Ring ağıllı üzüyündən fərqli olaraq Black Shark tərəfindən hazırlana ağıllı üzük çox iddialı istifadə müddəti vəd edir. Xatırladaq ki, MWC 2024-ün sonunda Koreya şirkəti ağıllı üzüyünün bir dəfə şarj olması ilə istifadədən asılı olaraq beş ilə doqquz gün arasında işləyəcəyini təsdiqlədmişdi. Bununla belə, qeyd etmək lazımdır ki, Black Shark batareyanın hansı standartlar altında və hansı ölçmə metodologiyasına uyğun olaraq bu istifadə müddətinə sahib olduğunu göstərmir.
Əslində 180 gün cihaz “gözləmə rejimində” olduqda yəni, istifadə edilmədən belə keçə bilər. Bundan əlavə olaraq, Xiaomi tərəfindən hazırlanan ilk ağıllı üzük şarj doldurma qutusu ilə birlikdə reklam olunur. Məhz bu səbəbdən, “180 gün” doldurma qutusundan şarj etməklə təmin olunan batareya ömrü ola bilər. Black Shark, üzüyün cəmi 2,2 mm qalınlığında olduğunu iddia edir. Şirkət iddia edir ki, bu dizayn “rahat geyilmə qabiliyyətini” təşviq edir. Əslində, ağıllı üzüklərin hamısını incə adlandırmaq olmaz, lakin qalınlığı 2,55 mm olan Oura Ring Gen3 istifadəçilər tərəfindən kifayət qədər rahat hesab olunur. Yeni ağıllı üzük “hərtərəfli sağlamlıq monitorinqi” ilə məşğul olacaq. İstehsalçı ürək döyüntüsü, qandakı oksigen miqdarı, bədən temperaturu kimi göstəriciləri ölçməyi vəd edir. Hələlik isə cihazın qiyməti və təqdimat tarixi məlum deyil.
