Samsung bu dəfə də təqdim etdiyi yeniliklər ilə həvəskarlarını təəccübləndirməyi bacarıb. Belə ki, cənubi koreya mərkəzli Samsung televizorları üçün yeni dekorativ simsiz dinamiklər təqdim edib. Samsung Music Frame adlı yeni simsiz dinamiklər Frame televizorlara daha gözəl görünüş qatacaq. Hətta yeni simsiz dinamiklər ayrıca olaraq televizorlara qoşulmadan da istifadə imkanı təklif edir. Ümumiyyətlə Samsung şirkəti uzun müddətdir ki, ağıllı televizorları evimizin bəzək əşyasına çevirməyə çalışır.
Premium səviyyəli Frame TV seriyası ilə Samsung ötən dövrlərdə diqqətləri cəlb etməyi bacarmışdı. İndi isə Samsung Frame TV televizorları üçün yeni dekorativ simsiz dinamiklər təqdim edir. Gəlin görək Samsung Music Frame adlı bu dinamiklər nədir? Samsung Music Frame adı ilə təqdim edilən yeni simsiz dinamik kvadrat formasındadır və əsasən Frame TV seriyasının aksesuarı kimi təqdim edilir. Bu dinamikin hər hansı bir ekran paneli mövcud deyil. Yəni istifadəçilər bu dinamikin ön çərçivəsindəki şəkilləri özləri dəyişdirmək məcburiyyətindədir.
İçərisində Bluetooth və Wi-Fi kimi texnologiyaları ehtiva edən dinamik istifadəçilərin istəyindən asılı olaraq heç bir Frame TV ilə bağlantı qurmadan da istifadə oluna bilər. Həmçinin Samsung Q-Symphony texnologiyası sayəsində yeni dinamiklər evinizi kinoteatra da çevirə bilər. Arxasında 2 vufer və öndə 4 sürücü olan dinamik, SpaceFit texnologiyası sayəsində səsi otağa uyğunlaşdıra bilir. Qeyd edək ki, yeni Samsung Music Frame yaxın aylarda satışda olacaq.
