Bildiyimiz kimi, Apple şirkəti ötən həftələrdə baş tutan WWDC tədbirinə yeni iOS 18 xüsusiyytələrini və funksiyalarını təqdim etmişdi. Məhz bu funksiyalar arasında istifadəçilərin diqqətini yeni tətbiq kilidləmə funksiyası çəkmişdi. Görünən odur ki, bu funksiya Samsung şirkətinin də diqqətini cəlb edib. Belə ki, Cənubi Koreya texnologiya nəhəngi Samsung indi smartfonlarına tətbiq kilidləmə funksiyası əlavə edəcək.
Qeyd edək ki, bu təhlükəsizlik və məxfilik xüsusiyyətinin One UI 7 yeniləməsi ilə Samsung smartfon və planşetlərinə gələcəyi bildirilir. Ümumiyyətlə, tətbiq kilidi funksiyası hazırda yalnız üçüncü tərəf proqramları ilə mümkündür və One UI proqramında mövcud deyil. Samsung istifadəçilərinin ən çox gözlədiyi bu xüsusiyyətin One UI 7.0 yeniləməsi ilə gələcəyi bildirilir. Paylaşılan ekran görüntüsündə tətbiqin kilidlənməsi seçimini Parametrlər – Qabaqcıl Xüsusiyyətlər bölməsində Dual Messenger altında görülür. Bu seçim One 6.1 versiyasında mövcud deyil.
Beləliklə, One UI 7.0 ilə birlikdə Samsung istifadəçiləri tətbiq kilidləmə funksiyasından istifadə etməyə başlayacaq. Samsung hazırda istifadəçilərə həssas proqramları, sənədləri, fotoşəkilləri və videoları Təhlükəsiz Qovluqda gizlətməyə icazə verir. Lakin bunun üçün də müəyyən quraşdırma prosesi tələb olunur. Yeni Tətbiq Kilidi funksiyası ilə buna ehtiyac olmayacaq və istifadəçilər proqramı sadəcə kilidləməklə bütün təhlükəsizlik problemlərinə son verəcək.
