Samsung OLED texnologiyalarının əlçatanlığında böyük bir addım atır və hətta büdcə smartfonlarını belə onlarla təchiz etməyi planlaşdırır. Şirkət gələn il gözlənilən Galaxy A15 modelindən başlayaraq “Galaxy A1” seriyasında bu tip ekrandan istifadə etməyi düşünür.
Bu, LCD ekranla təchiz edilmiş əvvəlki Galaxy A14 modelindən əhəmiyyətli səviyyədə üstün olacaq. Samsung üçün sərfəli modellərdə keyfiyyətli OLED panellərin istifadəsi istehlakçılara daha yaxşı təsvir keyfiyyətini təmin etməklə yanaşı, bazar tələbinin azalması səbəbindən son vaxtlar gərginləşən Samsung Display-in istehsal xətlərindəki yükü də yüngülləşdirməyə kömək edəcək.
Yeni yanaşma, həmçinin Cənubi Koreya nəhənginin daha əlverişli bazar seqmentlərində belə innovasiyalara və istifadəçi təcrübəsini təkmilləşdirməyə sadiqliyini vurğulayır. Şirkət istehlakçıların dəyişən tələblərinə uyğunlaşmağın vacibliyini başa düşür. Müştərilərə daha cəlbedici qiymətlərlə müasir texnologiyalar təklif etməyə çalışır. Bu vaxta qədər Samsung şirkəti giriş və ya büdcə seqment smartfonlarında xüsusilə, IPS LCD və ya TFT LCD panellərlə qarşımıza çıxırdı. Ümid edirik ki, şirkətin bu strategiyası həqiqətən işləyəcək. Çünki, Çinli şirkətlərin əksəriyyəti artıq bu istiqamətdə OLED ekrana uzun bir müddətdir keçid ediblər.
