Samsungun qatlana bilən smartfon bazarında ən yeni cihazlarından biri olacaq Galaxy Z Flip 7 ilə bağlı yeni məlumatlar ortaya çıxıb. Belə ki, Cənubi Koreya texnologiya nəhənginin dizaynda əhəmiyyətli dəyişikliklər etdiyi Galaxy Z Fold 7-dən fərqli olaraq, Galaxy Z Flip 7 böyük yeniliklər təklif etmir. Bununla belə, daxil olan məlumatlar ekran ölçülərində bəzi yeniləmələrin olacağını göstərir.
Sızdırılan render şəkillərinə görə, Z Flip 7-nin ölçülərində kiçik, lakin nəzərəçarpacaq dərəcədə artım var. Əvvəlki model olan Galaxy Z Flip 6 165,1 x 71,9 x 6,9 mm ölçüyə və 6,7 düymlük daxili, 3,4 düymlük xarici ekrana sahib idi. Yeni modelin ölçüləri isə 166,6 x 75,2 x 6,9 mm, daxili ekranı 6,8 düym, xarici ekranı isə 3,6 düym olacaq. Beləliklə, smartfonda qalınlıq baxımından heç bir dəyişiklik gözlənilmir. Smartfon açıldıqda qalınlığı 6,9 mm olacaq, lakin qatlanan zaman bu dəyər 15 mm-ə qədər artacaq. Z Flip 7-nin kamera tərəfində hər hansı əsas yenilik təklif etdiyini söyləmək olmaz. Cihazın 50 meqapiksellik əsas kamera və 12 meqapiksellik ultra geniş bucaqlı kameradan ibarət ikili obyektivli sistemlə gələcəyi bildirilir.
Bu quruluş əsasən sələfi Galaxy Z Flip 6-ya bənzəyir. Bununla belə, Samsung-un proqram təminatı tərəfində təkmilləşdirmələr edərək kamera performansını artıracağı gözlənilir. Ümumiyyətlə, Z Flip 7, ekran ölçüsündə kiçik artımlar istisna olmaqla, sələfinə çox oxşar bir cihaz kimi görünür. Qalınlıq və kamera xüsusiyyətləri dəyişməz qalsa da, çəki haqqında hələ dəqiq məlumat yoxdur. Görünür, Samsung bu modellə köklü dəyişikliklər etməkdənsə, mövcud dizaynı qoruyaraq daha yaxşı təkmilləşdirmələr etməyi seçib. Qeyd edək ki, rəsmi təqdimatdan sonra cihazın texniki detalları və yenilikləri bizə daha aydın olacaq.
