Samsung-un bu yaxınlarda təqdim etdiyi flaqman smartfonu Galaxy S25 Ultra YouTube-dakı PhoneRepairGuru kanalı tərəfindən sökülüb. Dizayn baxımından əhəmiyyətli dəyişiklikləri ehtiva edən smartfonun daxilində də əhəmiyyətli fərqlər var.
Belə ki, Samsung təmir qabiliyyətini əhəmiyyətli dərəcədə təkmilləşdirib. Galaxy S25 Ultra-nın arxa şüşəsi vantuz və izopropil spirtin köməyi ilə zədələnmədən asanlıqla çıxarıla bilər. Daxildə, yeni Qi 2 simsiz şarj bobininin yerini dəyişdirdiyi görünür. Təmiri asanlaşdırmaq üçün daha bir təkmilləşdirmə də batareya tərəfində edilib. Hansı ki, artıq batareyanın dörd tərəfində yerləşən “pull tabs” adlanan dırnaqları açmaqla batareyanı asanlıqla çıxarmaq olar. Bundan əlavə, yeni smartfonda S Pen-i aşkar edən NFC bobini də yer alır.
Smartfonun ana platasının ölçüsü də sələfi ilə müqayisədə kiçildilib. Beləliklə, yer və çəkiyə qənaət edilir. Kamera modulu əvvəlki modellə demək olar ki, eynidir. USB-C portunun ətrafında suya davamlılıq üçün rezin möhür və portu displeydə etibarlı şəkildə saxlamaq üçün yaşıl boşluq var. Görünən odur ki, Samsung detallara bir qədər diqqət yetirib və kiçik toxunuşlar edib. Ümumiyyətlə, Galaxy S25 Ultra əvvəlki modellərə nisbətən daha asan təmir oluna bilən telefondur. Ətraf mühitlə bağlı narahatlıqlar, xüsusən də Avropa Birliyinin göstərişləri istehsalçıları daha asan təmir oluna bilən telefonlar istehsal etməyə məcbur edir. Təbii ki, bu, biz istifadəçilər üçün müsbət haldır.
