Apple şirkətinin hazırda qatlana bilən iPhone üzərində işlədiyi və bu smartfonun özünü bərpa edən ekrana sahib olacağı iddia edilir. Ortaya çıxan iddialar görə, Apple şirkətinin hələ də qatlana bilən iPhone təqdim etməməsinin əsas səbəbi indiyə qədər yüksək keyfiyyət və davamlılıq standartlarına cavab verən məhsul ortaya çıxara bilməməsi idi. Bununla belə, məlumatlara görə, şirkət qatlanan telefonlar üçün yeni texnologiyanı patentləşdirib.
Patent təsvirində göstərilir ki, ekran üç əsas hissədən ibarət olacaq: iki sərt təbəqə və onları birləşdirən çevik hissə. Söhbət uzanan və orijinal formasına qaytarıla bilən elastik bir bölmədən gedir. Bu, ekranın zədələndikdən sonra özünü bərpa etməsinə imkan verəcək. Lakin yenə də qeyd etmək lazımdır ki, bütün patentləşdirilmiş texnologiyalar kommersiya məhsuluna çevrilmir. Apple bu texnologiyanı inkişaf etdirməyə davam etməli və prototip mərhələsini uğurla tamamlamalıdır.
Bundan əlavə, özünü bərpa edən ekranın istehsal xərcləri də nəzərə alınmalıdır. Çünki bu xərclər cihazın qiymətinə ciddi təsir göstərə bilər. Məhz son dövrlərdə ortaya çıxan iddialar və xəbərlər bir daha göstərir ki, Apple hazırda həvəskarlarının uzunmüddətdir ki, gözlədiyi qatlana bilən iPhone üzərində işləyir. Hazırda smartfonun nə zaman təqdim ediləcəyi və ya hansı xüsusiyyətlərə sahib olacağı məlum deyil.
