Notebook Review Studio-nun modderləri, içərisində Sony-nin PlayStation 5 oyun konsolunun komponentləri olan noutbuk yaradıblar. Söhbət korpusu 3D çap texnologiyası ilə hazırlanan və müxtəlif soyutma sistemi ilə təchiz edilmiş BBook AI Original Edition cihazından gedir. Beləliklə, Çinlilər bu dəfə PlayStation 5 modelini dünyada ilk dəfə olaraq 2750 dolllarlıq bir noutbuka çevirməyi bacarıblar.
Ümumilikdə, BBook AI Original Edition qalın noutbuka bənzəyir, lakin onun daxilində PlayStation 5 komponentləri olduğundan, cihaz yalnız Sony konsolu üçün nəzərdə tutulmuş oyunları idarə etmək üçün istifadə edilə bilər. Kifayət qədər böyük korpusuna baxmayaraq, cihazın daxilində heç bir batareya yer almır. Bu o deməkdir ki, noutbukdan istifadə etmək üçün onu elektrik enerjisi mənbəyinə qoşmaq lazımdır. Bundan əlavə, korpusda 71,3 dB-ə qədər səs-küy yayan kifayət qədər böyük soyutma sistemi var ki, bu da PlayStation 5-in eyni göstəricisindən xeyli çoxdur.
BBook AI Original Edition texniki xüsusiyyətlərə görə standart PlayStation 5-ə uyğun gəlir. Qeyd edək ki, noutbuka çevrilmiş PlayStation 5 modeli, Zen 2 arxitekturasına əsaslanan eyni səkkiz nüvəli prosessordan istifadə edir, 16 GB GDDR6 RAM və daha kiçik 2242 forma faktorunda 825 GB PCIe 4.0 diski ilə təchiz edilən cihaz olduqca böyük marağa səbəb olur. Modderlər oyun konsolunun komponentlərini 3840 × 2160 piksel təsvir ölçüsünü dəstəkləyən 17,3 düymlük IPS ekranla tamamlayıblar. Ekran 60Hz yeniləmə tezliyi, 1500:1 kontrast nisbəti, 400 cd/m² pik parlaqlıq və 100% DCI-P3 rəng sahəsi əhatə edən paneldən istifadə edir. BBook AI Original Edition çəkisi 4321 q və qalınlığı 31,3 mm-dir. Cihazın satılıb-satılmayacağı hələ dəqiq olmasa da, onun 2750 dollar qiymət etiketinə sahib olduğunu deyə bilərik.
