OnePlus şirkətinin smartfonları son illər əvvəl olduğundan daha az rəğbət görsə də Oppo brendinin altında fəaliyyət göstərən brend yeniliklərin ardınca getməyə davam edir. Belə ki, məşhur insayder OnLeaks tərəfindən OnePlus 12 barədə texniki detallar və smartfonun dizayn elementlərini əks etdirən görüntülər təqdim edilib. OnePlus 12 modeli öz üslubu ilə OnePlus 11 modelini əhəmiyyətli dərəcədə xatırladır. Lakin texniki baxımdan indiyə qədər xüsusilə kamera parametrləri cəhətdən bir çox zəif görünən xüsusiyyəti düzəldir.
OnePlus şirkətinin bu flaqman smartfonu növbəti ilin əvvəli anons ediləcək. Verilən məlumata görə kamera modulundakı böyük düzbucaqlı periskopik telefoto adasından göründüyü kimi cihaza təkmilləşdirilmiş kamera konfiqurasiyası quraşdırılacaq. İlk qeyd edilən məlumat əsas kameranın Sony IMX 9XX seriyasına aid olmasıdır. Yəni, böyük bir ehtimalla 1 düymlük kamera sensoru artıq OnePlus 12 modelinə də gələcək. Digər 2 kameramız isə biri 50MP JN1 əsaslı ultra-geniş bucaqlı, digəri 64MP OV64B sensorundan ibarət periskopik telefoto kamerası olacaq. OnePlus 12 modelinin neçə qat optik yaxınlaşdırma edəcəyi bilinməsə də bu kimi detallar smartfonu daha cəlbedici edəcək.
Selfi kameramız isə 32MP olub, dizayn baxımından ekranın mərkəzinə yerləşdiriləcək. Beləliklə, OnePlus-ın imzasına çevrilmiş sol üstdə olan selfi kamerası ənənəsi də bitəcək. Cüzi qıvrımlara malik ekran 6.7 düym olub QHD+ təsvir ölçülü OLED panellə dəstəklənəcək. Snapdragon 8 Gen 3 çipseti ilə birlikdə 5000 mAs həcmli batareyası 100 və ya 150 vatt seçimlərindən birində şarj sürətinə sahib olması gözlənilir.
Əsas məsələ isə, Oppo Find seriyası ilə bağlı olacaq. Bəzi insayderlərə görə OnePlus 12 Pro modeli Oppo brendinin növbəti flaqman modelinin təkrar brendləşdirilmiş variantı kimi qlobal bazarda kimi qarşımıza çıxa bilər. Belə olduğu halda 2024-cü il üçün Oppo və OnePlus brendlərinin məhsulları xeyli qarışıq bir hal yaradacaq.
