Nubia və ZTE brendləri smartfon sektorunda olduqca fərqli bir pillədə qərarlaşırlar. Çünki, bu şirkətlər illərdir sahiblik etdikləri cizgilər üzərində təkmilləşməyi özlərinə prioritet seçiblər. Bu cizginin ana xətti isə ekran altına gizlədilmiş selfi kameraları ilə istifadəçilərə “sonsuz ekran” təcrübəsi yaşatmaqdır. Bu gün təqdim olunmuş Nubia Z50 Ultra modeli də bu təcrübəni növbəti mərhələyə daşımaq üçün qarşımıza çıxır.
Nubia brendi əslində, ZTE şirkətinə məxsus Red Magic seriyasının “qardaşı” hesab edilir. Hətta Red Magic 8 seriyasını xatırlayırsınızsa Nubia Z50 Ultra modelinin eyni dizayn konseptini davam etdirdiyini görə bilərsiniz. Düzbucaqlı gövdə, adətən smartfona baxdıqda çərçivəsiz monitora baxırmış kimi formalaşan hissiyat və selfi kamerasının ekran altına quraşdırılması cihazın mükəmməliyinin əyani formada əks etdirir.
Yeni Nubia Z50 Ultra modeli nə vəd edir?
Smartfonun arxa tərəfinə baxdıqda olduqca nəhəng kamera modulunu görmək mümkündür. Burada bizi əsas kamera daxilində 64MP sony IMX787 sensoru gözləyir. Nubia şirkəti əsas kameranın 35 mm fokus məsafəsinə sahib olduğunu xüsusilə vurğulayır. Əslində, 35 mm fokus məsafəsi görüntünün nisbətən daralmasına (baxış bucağının kiçilməsinə) səbəb olsa da şirkətin fikrincə görüntü keyfiyyəti və sinematiklik cəhətdən 35 mm fokus məsafəsi daha idealdır.
Telefoto kamerasında da fokus məsafəsi mövzusu davam edir. 64MP telefoto kamerası 85 mm fokus məsafəsinə sahib olub 2,4 qat optik yaxınlaşdırma etməyi bacarır. Arxa tərəfdəki sonuncu və ya üçüncü kameramız isə 50MP təsvir ölçülü 116˚ ultra-geniş bucaqlı sensor olub Nubia dilindən baxsaq 14 mm fokus məsafəsinə malikdir. Həm əsas, həm telefoto kamerasında OIS olmasından əlavə smartfon OIS ilə də gücləndirilib. Ön tərəfdə isə ekran altına yerləşdirilmiş 16MP selfi kameramız mövcuddur.
Ekran altına yerləşdirilmiş demişkən, Nubia Z50 Ultra modeli artıq 4-cü nəsil UDC texnologiyasını dəstəkləyir. Zaman çox sürətlə keçdiyindən ekran altı kamera texnologiyaları da artıq xeyli təkmilləşdirilib. 6.8 düymlük AMOLED ekran paneli 2480 x 1116p təsvir ölçüsünə malikdir. 120Hz görüntü yeniləmə tezliyinə malik cihazın ekranı yanlardan 1.48 mm, çənə qismindən isə 1.68 mm qalınlıqda dizayn edilib. Selfi kamerasının daha keyfiyyətli görüntülər qeydə alması üçün selfi kamerasının üzərindəki işıq keçiriciliyi 30%, şəffaflıq isə 50% artırılıb. Bütün bunlar edilərkən, ekran işlək vəziyyətdə olduqda piksel sıxlığı çox yaxşı qorunduğundan selfi kamerası çox keyfiyyətli gizlədilib. BOE şirkəti ilə birlikdə hazırlanmış ekran paneli selfi kamerası üzərində bəzilərinizin cihazlarından belə daha yüksək, 400PPI piksel sıxlığı vəd edir.
Smartfonun performans, batareya və digər detalları nələrdir?
Nubia Z50 Ultra modeli öz gücünü Snapdragon 8 Gen 2 çipsetindən alır. Yüksək performanslı çipseti isə LPDDR5X operativ yaddaş və UFS 4.0 yaddaş çipləri ideal şəkildə tamamlayır. Smartfonun sağ üst hissəsində fiziki bir əlavə düymə də yerləşdirilib. Nubia şirkəti bunu istədiyiniz formada özəlləşdirə biləcəyiniz şəkildə hazırlayıb. 5000 mAs batareya ilə təchiz edilmiş cihaz 80 vatt sürətli şarj dəstəkləyir. Burada sonlandırıb cihazın qiymətinə nəzər salsaq, smartfonun başlanğıc qiyməti 8-256GB başlanğıc variantında sadəcə 580$ təşkil edir.
