Qatlanan telefon bazarının ən yaşlı nümayəndələrindən olan Motorola şirkəti Razr 40 ailəsini ötən gün təqdim edib. Belə ki, indiyə qədər görə biləcəyimiz ən ideal üfüqi qatlanan smartfonlara malikdir deyə biləcəyimiz Razr 40 seriyası öz premium və olduqca istifadəçi yönümlü dizaynı ilə diqqət çəkir. Əslində, ən çox fərqlənəni Motorola Razr 40 Ultra modelidir. Çünki, xaricindəki qapaq üzərində tam olaraq 3.6 düymlük ekran quraşdırılıb. Bu ekran isə bu seqmentə aid olan smartfonlar arasında bir ilkdir. Eyni zamanda Ekranın funksionallıqları da normal daxili ekrandan demək olar ki, fərqlənmir. İndi isə gəlin cihazlarla daha yaxından tanış olaq.

Motorola Razr 40 Ultra
Seriyanın bu modeli öz gücünü Snapdragon 8+ Gen 1 çipsetindən alır. Daxilində tam olaraq 6.69 düymlük FHD+ LTPO AMOLED ekran paneli quraşdırılıb ki, 165Hz görüntü yeniləmə tezliyini dəstəkləyir. UTG texnologiyalı olduqca nazik 5 qatlı qoruyucu ilə gücləndirilmiş ekran eyni zamanda 1400 nit parlaqlığa malikdir.

Xaricdə qalan ekranımız isə 3.6 düymdür və tam olaraq 144Hz görüntü yeniləmə tezliyinə malik 10 bitlik AMOLED ekran paneli quraşdırılıb. Eyni zamanda Gorilla Glass Victus ilə qorunur. Dünyanın ən böyük qapaq ekranı olmaqdan əlavə, eyni zamanda dünyanın ən keyfiyyətli qapaq ekranı da məhz bu modeldədir.

Smartfonun kamera parametrlərinə gəldikdə isə 12MP əsas kameramız OIS ilə gücləndirilib. Eyni zamanda 13MP ultra-geniş bucaqlı obyektivə malikdir.

Motorola şirkəti cihazın maksimum dərəcədə premium hiss etdirməsi üçün ciddi işlər görüb. 7000 seriyası alüminium gövdəyə və çərçivələr malik cihaz eyni zamanda qapaq hissələrin də Gorilla Glass Victus şüşə ilə qorunduğu quruluşa sahibdir. Təbii ki, cihazın yüngül və nazik olması da vacib olduğundan Motorola Razr 40 Ultra modelində qatlama mexanizmi 85 element olmaqla daha az detalla sahib yeni bir parça ilə dəyişdirilib. Beləliklə, daha dayanıqlı və uzunömürlü olub, eyni zamanda müxtəlif bucaqlarda rahatlıqla qala bilər.

IP52 sertifikatına malik smartfon 188 qram olub, eyni zamanda 3800 mAs batareyası 30 vatt naqilli və 5 vatt naqilsiz şarjı dəstəkləyir.
Motorola Razr 40
Razr 40 modeli daha çox Galaxy Z Flip seriyasını xatırladır. FHD+ təsvir ölçülü LTPO AMOLED ekranı 144Hz görüntü yeniləmə tezliyini dəstəkləyir. Xaricdə isə 1.5 düymlük yüngül işləri görməyə yarayan qapaq ekranı mövcuddur.

64MP əsas kamerası OIS ilə dəstəklənir və eyni zamanda 13MP ultra-geniş bucaqlı kameradan istifadə olunur. Selfi kameramız xatırlamışkən qeyd edək ki, hər iki cihaz üçün də 32MP təşkil edir. Gövdə ilə bağlı bənzər keyfiyyət göstərici detallar Razr 40 modelində də qorunur. Ekranın daha kiçik olması bu modeldə 4200 mAs batareyanın quraşdırılmasına şərait yaradıb. Şarj sürəti ilə əlaqədar detallarda isə dəyişiklik yoxdur.

Smartfonların qiymətinə gəldikdə isə qlobal bazar satış qiymətləri bu gün məlum olub. Avropada Motorola Razr 40 modeli 800 avrodan, Motorola Razr 40 Ultra modeli isə 1200 avrodan başlayaraq təklif ediləcək.