Lenovo texnologiya sənayesində yüksək keyfiyyətli notbuklar, fərdi kompüterlər və digər elektron avadanlıqlarla bağlı etibarlı brend kimi çox yaxşı ad çıxarıb. Xüsusilə oyun notbuklarında artan rəqabətin şirkəti ötən 8 il ərzində ciddi brendlərlə üzləşdirməsinə baxmayaraq, 2015-ci ildə bu istiqamətdə bazara daxil olduqdan bəri davamlı olaraq Lenovo brendi populyarlıq qazandı. Bu uğurun bir səbəbi Lenovo-nun geniş istehlakçı kütləsini cəlb edən rəqabətədavamlı qiyməti və yaxşı dizayn edilmiş oyun notbukları təklif etmək bacarığı idi. Çoxları bizimlə razılaşar ki, Lenovo şirkətinin dizayn etdiyi cihazlar çox gözəyatımlı üsluba malikdirlər. Nəhayət, 2023-cü ildə Lenovo tərəfindən Legion seriyasında Legion Slim 7 və 5 seriyası, eləcə də oyunu daha geniş auditoriyaya çatdırmaq məqsədi daşıyan yeni Lenovo LOQ seriyası ilə brend ən təkmili cihazlarını qarşımıza çıxarır. Gəlin Lenovo şirkətinin oyun kompüterləri dünyasında yeni nələr təklif etdiyinə daha yaxından nəzər salaq.
Lenovo Legion Slim 7 və 5 seriyası nə vəd edir?
Lenovo Legion Slim 7 və 7i
2023-cü ildə Lenovo tərəfindən alına biləcək ən dəbə uyğun, performanslı və erqonomik notbuk Legion Slim 7 seriyasından ola bilər. Ən incə nöqtəsi cəmi 1,79 sm və ən qalın nöqtəsi 1,99 sm olan bu notbuk sözün əsl mənasında yüksək performansı zəriflikdə axtaranlar üçündür. Dizayn baxımından Lenovo Legion Slim 7 seriyası əvvəlki nəsillərin premium metal konstruksiyalı üslubunu davam etdirir və iki rəng variantında təklif edilir.
Notbukun İlk diqqət çəkən nöqtəsi performans tərəfindən vəd etdiyi texniki xüsusiyyətlər deyil. Lenovo mühəndisləri, bu notbukla bizlərin qarşısına təkmilləşdirilmiş “Lenovo Artificial Intelligence (LA)” süni intellekti çipini çıxarır. Lenovo AI Engine+ vasitəsilə işləyən hər bir kompüter fan sürətlərinə adaptiv nəzarət etməklə yanaşı, CPU və GPU tərəfindən istifadə olunan (maksimum 140 Vatt TDP) gücü ağıllı və dinamik şəkildə dəyişdirə bilir. Bütün bunlardan əlavə hər bir tətbiq üçün optimallaşdırılmış gücə nəzarəti gəlir. Belə xüsusiyyətlər fanların yerli-yersiz işləməsini də minimuma endirir ki, notbuklar fanları ilə sizi yormur.
Səkkizinci nəsil Slim 7 modelləri texniki təminatı baxımından ən son imkanların hər birini sizlərin qarşısına gətirir. Legion Slim 7i üçün ən son 13-cü nəsil Intel Core i9-13900H və sadə Legion Slim 7 üçün AMD Ryzen 9 7940HS prosessoruna qədər yüksəldilə bilən variantı əldə etmək mümkündür.NNVIDIA GeForce RTX 4070 qrafik kartı isə hər iki notbuk üçün top variantda təklif olunur.
Daxili detallara diqqət yetirməyə davam etmək lazımdır. Çünki, Legion ColdFront 5.0 termal sistemləri soyutmanı əhəmiyyətli səviyyədə optimallaşdırır və performans davamlılığını kəskin şəkildə artırır. Bu, daha böyük hibrid mis istilik boruları və fanlara doğru uzanmış qanadlar, yenilənmiş termal lövhələr, daha da genişləndirilmiş hava girişləri və hava çıxışları hesabına əldə edilib. Turboşarjlı 12V ikili maye polimer fan sistemi ilə yanaşı, bu soyutma sistemi səssizlik işləməsi üçün də ayrıca sazlanıb.
16 düymlük ekran tərəfində möhtəşəm panel seçimləri ilə də Legion Slim seriyasının yeni nümayəndələri bizləri sevindirməyi bacarır. 240Hz adaptiv yeniləmə tezliyi ilə VRR 500 nitlik 16 düymlük WQXGA təsvir ölçülü IPS paneldən başlayaraq, daha yüksək təsvir ölçülü VRR 430 nitlik 3,2K ekran belə əldə etmək mümkündür. Lakin daha yüksək təsvir ölçülü ekrandan seçim etdikdə ekran panelinin tezliyi 165Hz səviyyəsinə qədər azalacaq. Legion Slim 7 və 7i standart olaraq 99,99WHr batareya ilə təchiz ediliblər. iki USB-C portundan hər hansı biri vasitəsilə enerji doldurma dəstəyinə malikdirlər.
Lenovo Legion Slim 5 və 5i
Lenovo Legion Slim 5 və 5i oyun notbukları isə sahib olduğu material və texniki xüsusiyyətlərinə görə Slim 7 seriyasından bir qədər aşağıda yerləşir. Burada ən yaxşı konfiqurasiyalar AMD Ryzen 9 7840HS və ya Core i7-13700H prosessorları ilə gəlir. Bununla belə, Legion Slim 5 seriyası hələ də istifadəçilərə RTX 4070 qrafik kartını əldə etməyə imkan verir. Hər iki seriyaya məxsus notbukları almış istifadəçilər operativ yaddaş həcmini 64GB 5600 Mhz DDR5 RAM-a qədər genişləndirə bilərlər.
Legion Slim 5 və 5i modelləri 16 və 14 düymlük 2 fərqli ölçülü ekran ilə təklif edilirlər. Texniki xüsusiyyətlərinə nəzər saldıqda, 16 düymlük Legion Slim 5 və Legion Slim 5i modelləri 240Hz tezlikli 16 düymlük WQXGA təsvir ölçülü Lenovo PureSight IPS panel əldə etməkdədirlər. Daha yığcam notbukla maraqlananlar 14 düymlük ekrana malik tamamilə yeni Lenovo Legion Slim 5 modelinə yönələ bilərlər. Bu kiçildilmiş model OLED texnologiyalı panelə malikdir. Legion Slim 5 və Slim 5i notbukları uyğun olaraq 80WHr batareya ilə təklif edilməkdədirlər.
Lenovo LOQ 15 və 16 seriyası nə vəd edir?
Lenovo vitse-prezidenti Jun Ouyang qeyd edir ki, “Yeni Lenovo LOQ brendinin başladılması ilə biz təkcə oyun cəmiyyətinin ən yaxşı oyunçuları üçün deyil, həm yeni, həm də gələcək oyunçular üçün nəzərdə tutulmuş oyun mükəmməlliyi və notbuk təklifləri gətiririk”. Yəni, yeni nəsil Lenovo LOQ seriyası xüsusilə oyunçular üçün bir çox maddi maneəni aradan qaldıraraq, onlara oyun dünyasına rahatlıqla atılmaq üçün bazara çıxarılıb.
Lenovo şirkətinin LOQ oyun noutbuklarından başlayaraq, bu cihazlar 13-cü nəsil Intel Core prosessoru və ya AMD Ryzen 7000 seriyalı prosessor əldə ediblər. Qrafik performansını NVIDIA GeForce RTX 4060 (115 vatt) qrafik kartı ilə top variantda verən LOQ seriyası notbuklar olduqca yüksək təcrübə vəd edir. İstəsəniz LOQ 15i modelini Core i7-13700H prosessoru ilə və ya digər modeli Ryzen 7 7840HS ilə əldə edə bilərsiniz.
Performans tərəfində Lenovo şirkətinin diqqət çəkdiyi şey MUX keçidinin olmasıdır. Bu, qrafik kartın NVIDIA Advanced Optimus vasitəsilə oyundan kompüter (windows) interfeysinə keçid etdikdə performans itkisini azaltmaq üçün nəzərdə tutulub. Yəni, aralıq görüntülər oyun zamanı performansa təsir etməmək üçün daxili qrafik kartı hesabına yaradıla bilər. Bu da xarici qrafik kartın əlavə yüklənməsini qoruyur.
Soyutma tərəfində Lenovo bildirir ki, ən son oyun noutbukları dörd istilik kanalından, ikiqat 85 mm 12V yüksəksürətli fanlardan (maksimum 135 Vatt TDP) əlavə böyük hava giriş və çıxışlarından istifadə edir. 15 düymlük WQHD piksel təsvir ölçülü IPS ekran paneli 165Hz görüntü yeniləmə tezliyinə malikdir. 16 düymlük WQXGA piksel təsvir ölçülü cüzi daha böyük seçimdə də təklif edilməkdədir. Maraqlıdırsa, G-Sync dəstəkli ekran paneli işlədildiyini vurğulamaq mümkündür.
Lenovo LOQ Tower kompüteri və Lenovo Legion Gaming monitorlar nə vəd edir?
Lenovo LOQ Tower potensialı ilə əla oyun təcrübəsi təqdim edə bilən ideal kompüter axtaran oyunçular üçündüe. Core i7-13700 prosessoru, ən son NVIDIA 40 seriyalı qrafik kartı, 32 GB-a qədər genişləndirilə bilən 3200MHz DDR4 RAM, 7200RPM SATA HDD2 daxili yaddaşı 2TB-a qədər PCIe NVMe™ TLC M.2 2280 SSD dəstəkləyir. 1 SSD və 2 HDD quraşdırıla bilər. Lenovo Legion kimi, bütün Lenovo LOQ cihazları Windows 11 ilə əvvəlcədən yüklənmiş şəkildə gəlir və Xbox Game Pass Ultimate daxilində üç aylıq abunəlik təklif edir.
Şirkət həmçinin, 2 böyük oyun monitorlarını da bazara çıxarıb. Uyğn olaraq biri 34 düym, digəri 45 düym olan monitorlar oyunçular üçün maksimum dərəcədə yüksək təcrübə vəd edir. Yeni 34 düymlük Lenovo Legion monitoru WQHD təsvir ölçülü qıvrımlı mini-LED DisplayHDR 1000 panelindən istifadə edir. O, 125% sRGB, 95% DCI-P3, 10bit rəng dərinliyi və Delta E<2 kimi əla xüsusiyyətlərə malikdir. 180Hz (OC) yeniləmə və 1ms (MPRT) cavab müddəti də oyunçular tərəfindən yüksək qiymətləndiriləcək. USB-C video/güc, HDMI 2.1, DisplayPort 1.4 kimi bağlantı xüsusiyyətlərinə sahibdir.
44,5 düymlük monitor həm oyunçular, həm də məzmun yaradıcıları üçün olduqca keyfiyyətlidir. O, 120% sRGB, 115% DCI-P3 qamutuna və 500nit parlaqlığa malikdir. 170Hz (OC) yeniləmə tezliyi və 1ms (MPRT) cavab müddəti yuxarıdakı 34 düymlük modelə bənzəyir və bu monitor AMD FreeSync Premium Pro dəstəkləyir. Eyni port dəsti bu böyük monitorda da mövcuddur.
