Apple-ın bu il SE seriyasını rebrendinq edərək satışa çıxaracağı iPhone 16E-nin gözləniləndən daha tez gələcəyi məlum olub. Beləliklə, ən ucuz iPhone 16E modeli bu ilin ilk yarısında qarşımıza çıxa bilər.
Sızan məlumatlara görə, bu ilin əvvəlində baş tutması gözlənilən Apple tədbirində “Roma” kod adlı yeni model istifadəçilərə təqdim ediləcək. Sözügedən tədbir çox güman ki, mart ayında keçiriləcək, lakin Apple-ın əvvəlki təqvimlərinə əsasən may ayı da ehtimallar arasında yer alır. Qeyd edək ki, yeni modelin çoxdan gözlənilən yeni iPhone SE modeli olduğu iddia edilir. Normalda iPhone SE 4 adı ilə gəlməsini gözlədiyimiz yeni modelin adı son xəbərlərə görə “iPhone 16E” olaraq dəyişdirilib. Bu yeni telefonun iPhone 14-ə bənzədiyi, lakin daha müasir dizayna malik olduğu deyilir.
Bundan əlavə, iPhone 16E-nin texniki xüsusiyyətləri də diqqəti cəlb edir. Telefonun 8 GB RAM ilə təchiz ediləcəyi və Apple tərəfindən hazırlanmış yeni süni intellekt texnologiyası olan Apple Intelligence-i dəstəkləyəcəyi bildirilir. Bu isə smartfonun təkcə iqtisadi iPhone alternativi deyil, həm də iddialı performansa malik bir model olacağını göstərir. Yeni iPhone-un qiymətinin arta biləcəyi ilə bağlı söz-söhbətlər yayılsa da, uzun müddətdir yenilənməyən SE seriyasına bu modellə böyük tələbat olacağı gözlənilir. Habelə, yeni iPhone 16E-nin kütləvi istehsala hazırlandığı və bu səbəbdən dizayn və sınaq mərhələlərinin sona çatdığı bildirilir.
