Apple şirkətinin ötən günlərdə satışa çıxardığı yeni iPhone 16 seriyası bəzi problemlər ilə mübarizə apararkən, iFixit komandasından müsbət xəbərlər gəlib. Belə ki, iFixit-ə görə iPhone 16 bu günə qədər ən asan təmir edilə bilən iPhone modeli olub.
Yeni iPhone 16 texnologiya həvəskarları və öz cihazlarını təmir etməyi sevənlər üçün sevindirici təkmilləşdirmələrə malikdir. iFixit komandası tərəfindən aparılan təmir araşdırmasına görə, iPhone 16 Apple-ın bu günə qədər ən asan təmir edilə bilən iPhone modelidir. Bildirilir ki, bir sıra mühüm dəyişikliklər cihazın təmirini asan və təhlükəsiz edib. iPhone 16-da edilən ən diqqətəlayiq dəyişikliklərdən biri batareyanın cihazın içərisində necə qorunduğu ilə bağlıdır. Əvvəlki modellərdə batareyanı yerində saxlamaq üçün zolaqlardan istifadə edilirdi, lakin bu zolaqlar tez-tez qırılır və istifadəçilər batareyanı diqqətlə çıxarmaq istəyərkən partlama riski ilə üzləşirdilər.
Apple bu problemi həll etmək üçün yeni yapışdırıcıya keçid edib. 9-12V DC cərəyanı istifadə edərək, yapışdırıcı boşaldılır və batareya asanlıqla çıxarılır. iFixit bu prosesi yeni FixHub lehimləmə stansiyaları ilə 12V istifadə edərək uğurla həyata keçirib və prosesin cəmi bir dəqiqə çəkdiyini bildirir. Digər mühüm dəyişiklik isə Apple Watch-da olduğu kimi batareyanın plastik torba strukturunun polad korpusla əvəzlənməsidir. Bu sadə, lakin effektiv yenilik batareyanın təmir və ya dəyişdirilməsi zamanı zədələndiyi təqdirdə partlayış riskini əhəmiyyətli dərəcədə azaldır və təmir prosesini daha təhlükəsiz edir. Məlum olduğu kimi, litium-ion batareyalar hər hansı alət ilə deşildikdə dərhal oksigen ilə reaksiyaya girərək yanmağa başlayır.
Əvvəlki iPhone modellərində batareyanı və ya digər daxili komponentləri əvəz etmək üçün ekranı tez-tez çıxarmaq lazım gəlirdi. Apple, iPhone 14-ün əsas modelində cihazın ön və ya arxasından girişə imkan verən dizayn dəyişikliyi etmişdi. Məhz bu yenilik indi iPhone 16 Pro və Pro Max modellərinə gətirilib. Bütün bu təkmilləşdirmələr nəticəsində iFixit iPhone 16-ya təmir qabiliyyəti baxımından 7 bal verib. Bu, iPhone 15-in aldığı 4 xalla müqayisədə böyük irəliləyiş hesab oluna bilər.
