Artıq yeni iPhone 15 seriyasının təqdim edilməsinə günlər qalıb və iddiaların sayı çoxalmağa başlayıb. Nəhayət iPhone 15 Pro Max modelinin batareya həcmi məlum olub. Təəssüf ki, xəbərlər heç də ürəkaçan deyil. Çünki yeni model sələfindən sadəcə 2% daha çox batareya həcminə sahib olacaq. Ümumiyyətlə bu il Apple brendi batareya tərəfində bir çox yeniliklər edəcək. Ötən günlərdə yeni iPhone 15 modellərinin şarj sürəti ortaya çıxmışdı.
Ötən günlərdə Apple brendinin iPhone 15 seriyalı smartfonlarının şarj sürəti ilə Samsung ilə rəqabətə daxil olacağı məlum olmuşdu. Hətta yeni modellərin nə az, nə çox 35 Vt enerji toplayacağı ortaya çıxmışdı. Bundan əlavə yeni qərar ilə artıq bütün iPhone modellərinin USB-C girişi ilə təchiz ediləcəyi də məlum idi. Bütün bu sadaladıqlarımız müsbət yeniliklər olsa da, Apple iPhone 15 Pro Max modelinin batareya həcminə çox önəm verməyib. Belə ki, yeni flaqman model sadəcə 4852 mAs batareya həcminə sahib olacaq. Bu isə iPhone 14 Pro Max modelindən sadəcə 2% daha çoxdur.
Əslində hər il Apple bütün flaqman modellərini 12% daha böyük həcmli batareyalar ilə təchiz edirdi. Bu il isə artırılmış şarj sürəti və USB-C girişi ənənəni pozub. Majin Budan adlı analitik tərəfindən ortaya çıxarılan məlumat bir çox iPhone həvəskarını məyus edib. Buna baxmayaraq yeni iPhone 15 Pro Max modeli periskop kameralı ilk Apple smartfonu olacaq.
