Apple şirkəti ABŞ bazarı üçün iPhone 14 seriyasının qiymətində dəyişiklik etməsə də Avropa bazarı üçün qiymətlərin biraz yüksəldiyini müşahidə etmişdik. Belə ki, Tokio mərkəzli tərsinə mühəndislik və analitika şirkəti olan Fomalhaut Techno Solutions, Nikkei media əməkdaşlığında iPhone 14 seriyasının komponentlərinin qiymətini hesablayıb. Parçalarına ayrılan iPhone 14 Pro Max modelinin tərsinə mühəndisliyinin timsalında iPhone 14 seriyasının istehsalının daha başa gəldiyi ortaya çıxıb. iPhone XS Max modelindən bu yana ən güclü modelinin komponentləri təqribi 400-450 dollara başa gəlirdisə, iPhone 14 Pro Max modeli üçün komponentlər təqribi 501 dollara istehsal edilir.
A16 Bionic çipsetinin istehsalı A15 Bionic ilə müqayisədə 2.4 dəfə daha baha başa gəlir
iPhone 14 Pro və iPhone 14 Pro Max modellərində istifadə olunan A16 Bionic çipsetinin istehsal dəyəri təqribi 110 dollar təşkil edir. Yəni smartfonun maya dəyərinin 1/5-lik hissəsi məhz A16 Bionic əsaslı platformanın inşasına xərclənir. Bunun da əsas səbəblərindən biri 4nm texnoloji proseslə Apple şirkətini təmin edən TSMC şirkətinin qiymətləri yüksəltməsi ola bilər.
Digər bir tərəfdən Sony şirkətinin IMX CMOS kamera sensorlarının da qiymətində əhəmiyyətli artım var. Ölçüsü 30% daha böyük olan yeni sensorlar, 50% daha bahalıdır və istehsal dəyəri 15 dollara qədər yüksəlir. Həmçinin, Samsung şirkətinin Apple üçün xüsusilə təkmilləşdirdiyi M12 OLED ekran panellərinin də qiymətində yüksəliş olduğu ehtimal edilir. Təsadüf deyil ki, hal-hazırda iPhone 14 Pro və iPhone 14 Pro Max modellərinin ekran təminatçısı yalnız Samsung şirkətidir. İndiyə qədər LG və BOE şirkətləri ilə də əməkdaşlıq etmiş Apple, bu modellərinin hazırlanmasında yalnız Samsung istehsalı ekran panellərindən yararlanır.
iPhone 14 seriyasının istehsal edilməsi zamanı komponentlərin 32.4%-lik hissəsi Amerikada, 24.8%-lik hissəsi Cənubi Koreyada, 10.9%-lik hissəsi Yaponiyada hazırlanır. Çin, Hindistan, Cənub-Şərqi Asiya isə yerdə qalan hissələrə sahiblik edir. Fomalhaut Techno Solutions şirkəti peyk bağlantısı ilə bağlı xüsusi bir texniki detal aşkarlamayıb. Ona görə sırf texniki komponent kimi bu cəhətdən dəyərə təsir edəcək hər hansı bir şey yoxdur.
