Keçmiş Apple idarəçiləri tərəfindən qurulan Humane şirkəti uzunmüddətdir ki, üzərində işlədikləri Humane Ai Pin cihazını nəhayət təqdim edib. Qeyd edək ki, Humane şirkətinin arxasında 21 ildən çox müddət ərzində Apple-ın əsas məhsullarının dizaynı üzərində işləyən İmran Çaudhri (ilk iPhone daxil olmaqla) və 8 ildən çox Apple-da iOS və macOS əməliyyat sistemlərində işləyən Bethany Bongiorno var. Ömrünü texnologiyada keçirən bu təcrübəli adlar qurduqları yeni şirkətlərlə fərqli bir texnologiya yaratmaq istəyirlər. Özləri üçün güclü bir komanda quran Chaudhri və Bongiorno son olaraq bir investisiya xəbəri ilə gündəmə gəlib. Şirkətləri üçün 100 milyon dollarlıq sərmayə yığmağı bacaran bu iki şəxs indi yeni cihazını təqdim edib.
Xatırladaq ki, Bu maraqlı cihaz ilk dəfə TED 2023 konfransında nümayiş etdirilmiş və onun son adı Humane Ai Pin kimi təsdiqlənmişdi. “Getdiyiniz yerə süni intellekt götürün” devizi daşıyan bu qeyri-adi məhsul artıq rəsmi olaraq qarşımızdadır. Qeyd edək ki, GPT-4 dil modelinə əsaslanan bu cihaz, adi smartfonların sahib olduğu demək olar bütün funksiyalara sahibdir. Lakin fərq ondan ibarətdir ki, bu cihazda ekranı siz özünüz təyin edirsiniz. Hələlik cihazın hansı yollardan keçərək bu günə qədər gəlib çatdığını bildirdik. İndi isə gəlin texniki detallara keçid edək.
İlk öncə onu qeyd edək ki, barmaq və əl jestləri ilə idarə edilən qualcomm imzalı bu cihaz snapdragon prosessoru ilə təchiz edilib. O cümlədən AI Pin batareya ilə birlikdə sadəcə 54 qram ağırlığa və 13 MP kameraya sahibdir. Hələlik cihazın foto və video çəkmək funksiyası əlçatan olmasa da, yenilənmə ilə şirkət bu funksiyanı da aktivləşdirəcək. Mikro lazer proyektoruna sahib olan bu cihaz istifadəçilərinin əlini ekrana çevirə bilir. Yekunda isə istifadəçilər 699 dollar başlanğıc qiymətinə sahib olan bu cihazdan istifadə edərək, smartfonlarda etdikləri bütün funksiyaları, zəng, mesajlaşma kimi funksiyaları bu cihazda da edə biləcək. Maraqlısı budur ki, cihazdakı süni intellekt sistemlərinə daxil ola bilmək üçün istifadəçilər aylıq 24 dollar ödəməlidir.
