Son günlərdə ABŞ sanksiyalarına rəğmən ardıcıl yeniliklər təqdim edən Huawei bu dəfə ucuz qatlanan smartfon hazırlamaq üçün işə qoyulub. Belə ki, çinli texnologiya nəhəngi gələn ilin ilk yarısında 735 dollar qiymət etiketi ilə Pocket seriyasına yeni qatlana bilən smartfon əlavə etməyi planlaşdırır. Ümumiyyətlə hazırda qatlana bilən smartfonların hamsı flaqman səviyyəsindədir. Bunun əsas səbəbi də bu cihazların istehsal xərcinin bir xeyli çox olmasıdır. Lakin Huawei bu xərcləri azaltmağın bir yolunu taparaq daha ucuz qatlana bilən cihaz hazırlamaq niyyətindədir.
Maraqlısı budur ki, gələn il bazara çıxacaq smartfonun qiyməti sadəcə 735 dollar qiymətə sahib olacaq. Bu qiymət qatlana bilən smartfonlar üçün çox ucuz hesab olunur. Çünki, hazırda bazarda olan əksər qatlanan smartfon 1000 dollardan baha qiymətə təklif olunur. Huawei isə Pocket seriyasına yeni ucuz və orta səviyyəli qatlanan smartfon əlavə edərək daha çox müştəri cəlb etməyi düşünür. Görünən odur ki, bu cihaz indiyə qədər məlum olan ən sərfəli qatlana bilən smartfon adına layiq görüləcək.
Xatırladaq ki, çinli smartfon nəhəngi ötən il çin bazarına ilk qatlana bilən telefonu P50 Pocket modelini təqdim etmişdi. Yeni smartfon isə daha sərfəli qiymətə sahib olacaq. Hazırda smartfon bazarının çox kiçik bir hissəsini təşkil edən qatlanan smartfonlar əsasən yüksək qiymətə sahib olduğu üçün diqqət cəlb etmir. Lakin Huawei yeni cihazı ilə smartfon bazarında vəziyyətin dəyişməsinə səbəb ola bilər.
