Bir zamanlar dünyanın ən innovativ smartfon istehsalçısı olan Huawei şirkəti bu gün sadəcə bazarı itirməmək üçün “çabalayırmış” kimi görünür. Belə ki, Huawei Mate 50 seriyasının demək olar bütün detalları, dizaynından tutmuş texniki xüsusiyyətlərinə qədər hər şey ortaya çıxıb. Mövzunu çox uzatmadan Mate 40 seriyasının təkmilləşdirilmiş halı kimi görünən və biraz da Honor Magic 4 qohumluğu olan Mate 50 seriyasına nəzər salaq.
Mate 50 seriyasında 4 fərqli modelin olacağı bildirilir
Ortaya çıxan detallar və sızdırılmış görüntülərin şirkətdə işləyən naməlum şəxs tərəfindən paylaşıldığı deyilir. Ona görə də məlumatların doğruluq payı olduqca yüksəkdir. Huawei Mate 50 seriyasında 4 yeni model qarşımıza çıxarılacaq. Həmin cihazlar şəkillərdən də gördüyünüz kimi Mate 50E, Mate 50, Mate 50 Pro, Mate 50 RS olaraq adlandırılıb. Mate 50 seriyası ilə bağlı detalları analiz etdikdə 50E modeli istisna olmaqla digər 3 smartfonun Snapdragon 8 Gen 1 çipsetinə sahib olduğu görülür. Bu çipset yalnız 4G dəstəyinə sahib olsa da 5G dəstəkli örtük ilə cihazlar yeni nəsil bağlantı texnologiyasını dəstəkləyəcək. Seriyanın zəif bəndi olan Mate 50E isə Snapdragon 778G ilə təchiz edilməkdə olub, digər modellər kimi yalnız 4G bağlantısına malik olacaq.
Mate 50 Pro və Mate 50 RS modellərində 6.78 düymlük 120Hz tezlikli LTPO AMOLED ekran paneli işlədiləcək. Sadə Mate 50 modelində isə 6.28 düymlük LTPS OLED ekranı işlədiləcək və görüntü yeniləmə tezliyi 90Hz olacaq. Bu ekran panelinin eyni zamanda Mate 50E modelində də olacağı gözlənilir.
Mate 50 seriyası bundan sonra Leica imzası yox, XMAGE adı verilən şirkətə məxsus brendin imzasını daşıyacaq. XMAGE üçün smartfonlara xüsusi bir neyron çipi (NPU) quraşdırılacaq. Bununla da kamera parametrlərindən əlavə olaraq texniki səviyyədə proqram təminatına verilən dəstək gücləndiriləcək. 50 Pro və 50 RS modellərində Sony IMX800 əsaslı kamera konfiqurasiyası Honor Magic 4 seriyasına bənzəyəcək. Sadə Mate 50 modelində isə Sony IMX766 sensoru əsas kamera rolunu oynayacaq.
Pro və RS modellərində 4500 mAs həcmli 66 Vt sürətli şarj dəstəkləyən batareya mövcud olacaq. 4 smartfondan əlavə MatePad Pro 12.4 adı verilən 11 düymlük MatePad Pro modelinin daha böyük versiyası da satışa çıxarılacaq. Cİhazların təqdimat tarixi 6 sentyabr tarixinə planlaşdırılıb.
