Orta seqmentdə premium görünüşlü smartfon kimi bilinən Honor X9a modelinin davamçısı Çində yenilənib. Belə ki, söhbət Honor X40 modelinin xələfi olan Honor X50 modelindən gedir. Smartfon dizayn baxımından çox dəyişməyib. Əsas dizayn elementlərini saxlayaraq sadəcə bəzi vacib texniki imkanlar əldə edir.
Smartfon öz gücünü Snapdragon 6 Gen 1 çipsetindən alır. Orta seqment üçün standart olan bu çipset isə ekran müddətini artırmaq üçün 5800mAs həcmli batareyadan bəslənir. Batareya texnologiyalarına ciddi maraq göstərən Honor brendi bu cihazda diqqətini bir daha nümayiş etdirir. Batarayedan danışmışkən, Honor X50 modeli 33 vatt sürətli şarj dəstəkləyir. Məhz bu detal biraz təəssüfləndirir ki, şarj müddəti 1 saatın üzərinə çıxır.
6.78 düymlük qıvrımlı AMOLED ekran 1200×2652 piksel təsvir ölçüsünə malikdir və standart FHD+ ekranlardan daha yüksək keyfiyyətə sahibdir. Görüntü yeniləmə tezliyi 120Hz olub, 1200 nit parlaqlığa sahibdir. Ekran eyni zamanda yüksək tezlikli PWM qarartma texnologiyası və Honor tərəfindən təkmilləşdirilmiş yüksək dayanıqlı şüşə ilə təchiz edilib. Əgər hiss etdinizsə Honor X50 modelində en və uzunluq nisbəti də optimallaşdırılb ki, ekrana baxdıqda sələfi ilə müqayisədə uzun yox enli görünür.
Kamera baxımından isə yenə biraz əksiklər mövcuddur. Əsas sensorumuz ISOCELL HM6 108MP olub standart orta seqment cihazlarla eyni nəticəni göstərir. Əlavə olaraq isə sadəcə 1 ədəd 2MP makro sensorumuz mövcuddur. Selfi kamerası 8MP təşkil edir.
6 vatt tərs şarja da malik olan cihaz Android 13 üzərinə MagicOS 7.1 interfeysi ilə qutudan çıxır. IP53 ilə toz və su sıçramalarına dayanıqlıdır. Qiymətinə gəldikdə, 8-128GB başlanğıc variantı sadəcə 193 dollardır.
