HONOR yeni qatlana bilən smartfon modelini bizlərə təqdim edib. Belə ki, yeni təqdim edilən Honor Magic V3 qatlanan smartfonu artıq sələflərindən daha incədir. Bundan əlavə, yeni model seriyanın ən incə qatlanan smartfonu da adlanır. Həmçinin, Magic V3 modeli bu yaxınlarda təqdim edilən Galaxy Z Fold 6 ilə rəqabət aparır.
Ümumiyyətlə, bu smartfon Magic V2 modelinin varisi olaraq Çində təqdim edilib. Smartfonun yaxın aylarda daha dəqiq desək, sentyabrda IFA 2024 tədbirində qlobal bazar üçün təqdim edilməsi gözlənilir. Gəlin görək yeni Honor Magic V3 modeli hansı xüsusiyyətlərə sahibdir?
İlk olaraq qeyd edək ki, yeni qatlanan smartfon sadəcə 9,2 mm qalınlığa sahibdir. Müqayisə üçün desək, Samsung-un bu yaxınlarda ən nazik Fold kimi təqdim etdiyi Galaxy Z Fold 6 12,1 mm qalınlığa sahib idi. Magic V3 həmçinin Z Fold 6 və hətta Galaxy S24 Ultra-dan da daha yüngüldür yəni cəmi 226 qram ağırlığındadır. HONOR həmçinin iddia edir ki, telefonun menteşəsi bu günə qədər ən incə menteşə hesab oluna bilər. 500 min dəfə qatlana bilən smartfon əvvəlki seriyalardan mövcud olmayan IPX8 sertifikatına da sahibdir.
Yeni Honor Magiv V3 modeli 7,92 düymlük qatlanan ekran və 6,43 düymlük xarici ekran ilə gəlir. Qeyd edək ki, bu ekranlar müvafiq olaraq 2,344 x 2,156 və 2,376 x 1,060 təsvir ölçüsünə sahibdir. HONOR iddia edir ki, ekran HDR məzmunu üçün 5000 nit parlaqlığa çata bilər. Daxili ekranın parlaqlığı 1800 nit, xarici ekranın parlaqlığı isə 2500 nit təşkil edir. Bundan əlavə, smartfon öz gücünü Snapdragon 8 Gen 3 çipsetindən alır. Bu modeldə daha böyük buxar əsaslı soyutma sistemindən istifadə edilir. Buna baxmayaraq, smartfon 5150 mAh silikon əsaslı batareya ilə təchiz edilmişdir. Bu batareya isə öz növbəsində, 50 Vt simsiz, 66 Vt simli şarj dəstəkləyir. Yeri gəlmişkən, Magic V2 simsiz şarj funksiyasına malik deyildi.
Kamera tərəfində isə Magic V3 modeli 50MP əsas kamera (f/1.6), 40MP ultra geniş bucaqlı kamera (f/2.2) və 50MP 3.5x periskop kameradan (f/3.0) ibarət üçlü arxa kamera sisteminə malikdir. Smartfon həmçinin 20MP selfie kamerasına sahibdir. Smartfon 16 GB RAM və 1 TB-a qədər yaddaş seçimlərinə sahibdir. Qiymət tərəfində isə müvafiq olaraq 12GB + 256GB versiya 1240 dollar, 16GB + 512GB versiya 1378 dollar və nəhayət 16GB + 1TB versiya isə 1516 dollar qiymət etiketinə sahib olub.
