Honor şirkəti ötən həftə Barselonada baş tutan tədbirdə Honor Magic 5 seriyasının bütün modellərini rəsmi olaraq qarşımıza çıxarmışdı. Belə ki, Honor Magic 5 seriyasında görünməyən tək model bu gün Çində ilk dəfə anons edilən başlıqdan oxuduğunuz Honor Magic 5 Ultimate oldu. Əslində, Magic 5 Ultimate modeli sələfi Magic 4 Ultimate qədər mükəmməl bir yüksəltmə gətirən model deyil. Çünki, texniki baxımdan Magic 5 Pro modelinin üzərinə Magic 5 Ultimate bir dəyişiklik gətirmir. Cihazdakı əsas dəyişiklik özünü dizayn tərəfində göstərir.
Smartfonun arxa tərəfində Honor Magic 5 Ultimate üçün xüsusi seçilən portağal (Burning Orange) və boz çalarlı qara (Elegant Black) süni dəri qapaqdan istifadə olunur. Eyni zamanda arxa qapaq əlavə çıxıntılara sahib olub, kamera moduluna doğru uzanan stilə malikdir. Kamera modulunun kənarları isə daha kəskin bucaqlara sahib yeni bir kənar kəsik alıb. Lakin texniki baxımdan kamera konfiqurasiyasında heç bir yenilik yoxdur.
Qutu daxilinə dəri qobur (kaburo) və Type-C qulaqlıqlar əlavə olunub. Eyni zamanda qutu daha premium görünüşdə dizayn edilib. Səhifənin sonundan Honor Magic 5 Pro modeli çıxarkən yazdığımız təqdimat məqaləsində Magic 5 Ultimate modeli üçün də xarakteristik detallar barədə məlumat əldə edə bilərsiniz. Lakin qısaca bəzi xüsusiyyətləri xatırlamaqda fayda var.
Smartfon öz gücünü Snapdragon 8 Gen 2 çipsetindən alır. 1/1.12 düymlük 50MP təsvir ölçülü əsas, isə 3.5 qat optik yaxınlaşdırma edə bilən 50MP təsvir ölçülü IMX858 periskopik, 50MP təsvir ölçülü 122° ultra-geniş bucaqlı kameralar mövcuddur. Ultra-geniş bucaqlı kamera istisna olmaqla kameralar OIS ilə gücləndirilib.6.81 düymlük ekran dörd tərəfdən qıvrımlara malik 120Hz LTPO AMOLED ekranla gücləndirilib. Silikon-karbon batareya, litium tərkibli batareya ilə eyni ölçüdə 5450 mAs “həcmə” malikdir və təqribi 12,8% daha yüksək enerji sıxlığı gətirir.
Android 13 üzərində MagicOS 7.1 interfeysi ilə qutudan çıxan cihazın qlobal bazara gəlməsi nəzərdə tutulmur. Honor Magic 5 Ultimate modeli 20 mart tarixindən etibarən 6699 Yuan (970$) başlanğıc qiymətə Çində təklif olunacaq.
