2016-cı ildə Tap Strap adlanan cihaz, istifadəçilərə bluetooth vasitəsilə digər cihazları uzaqdan idarə etməyə imkan verirdi. Belə ki, Tap Strap cihazı barmaqlara keçirilərək klaviatura funksiyasını yerinə yetirirdi. Tap Strap cihazının ixtiraçıları indi isə Tap Strap-in davamı hesab olunan TapXR adlı yeni qolbaq hazırlayıblar. Qeyd edək ki, cihazların hər ikisi Kaliforniyada yaradılan “Tap” startapına məxsusdur.
TapXR qolbağının işləmə prinsipi
Yeni cihaz, hansı barmaq və ya barmaqların yaxınlıqdakı səthə toxunduğunu müəyyən etmək üçün qolbağa inteqrasiya edilmiş hərəkət və optik sensorlardan istifadə edir. Bu sensorlar vasitəsilə qolbaq barmağın hər hansı səth üzərində olan hərəkətini 99% dəqiqliklə qoşulduğu cihaza ötürür. Cihaz klaviatura funksiyasını da yerinə yetirir və istifadəçilərə bir əllə dəqiqədə 70 söz yazmağa imkan verir. Həmçinin cihaz, 100-dən çox fərdi hərəkəti müəyyən etmək və ötürmək üçün istifadəçi tərəfindən proqramlaşdırıla bilər. Qolbaq istifadəçilərin əmr verməli olduğu, lakin real dünyadakı klaviaturanı görə bilmədiyi VR tətbiqlərində istifadə üçün daha uyğundur.
Şirkətin verdiyi məlumata görə, TapXR əksər VR və AR cihazlarına, həmçinin Windows, Mac, Linux ilə işləyən kompüterlərə, o cümlədən iOS, Android əməliyyat sistemi ilə işləyən əksər planşet və smartfonlara qoşula bilir. Şirkət həmçinin qolbağın 4 saatlıq şarj ilə 10 saat işləyə biləcəyini də vurğulayıb.
Qolbaq 6 müxtəlif rəngdə, həmçinin 2 ölçüdə satışa çıxarılıb. Cihazı 249 dollara sifariş etmək mümkündür lakin, çatdırılma gələn ilin birinci rübündən başlayacaq.
