Galaxy S25 seriyası Geekbench verilənlər bazasında SM-S936B model nömrəsi ilə bütün diqqətləri öz üzərinə çəkib. Belə ki, Geekbench verilənlər bazasında görünən SM-S936B Galaxy S25 seriyasında Exynos çipsetindən istifadə olunduğunu göstərir.
Gələn ilin əvvəlində təqdim olunacaq Samsung Galaxy S25 seriyası ilə bağlı olduqca təəccüblü bir xəbər ortaya çıxıb. Məlum olduğu kimi, bütün seriyanın Qualcomm Snapdragon 8 Elite prosessoru ilə təchiz ediləcəyi iddia edilirdi. Əslində şirkətin özünün Exynos 2500 çipsetinin istehsalında bəzi çətinliklərlə üzləşdiyi üçün belə bir qərar verdiyi deyilirdi. Lakin son hadisələr bunun tam əksini göstərir.
Exynos çipsetli Galaxy S25+ Geekbench verilənlər bazasında SM-S936B model nömrəsi ilə peyda olub. Smartfon təknüvəli testlərdə 2 min 359, çoxnüvəli testlərdə isə 8 min 141 bal toplaya bilib. Əslində bu xəbəri, Cənubi Koreya markasının Exynos 2500-dən tamamilə imtina etməməsi kimi şərh etmək olar. Testə daxil olan konsept smartfona güc verən Exynos 2500, 3,3 GHz-ə qədər saat sürətinə malikdir və 10 nüvəli CPU arxitekturasını qəbul edir. Bununla birlikdə, Samsung-un Xclipse 950 GPU-nu ehtiva edir. Geekbench məlumatlarına görə, Samsung-un prosessorunun tək nüvədə Qualcomm çipindən çox geri qaldığı, lakin çoxnüvəlidə oxşar performans göstərdiyi bildirilir. Müqayisə üçün qeyd edək ki, Qualcomm Snapdragon 8 Elite prosessorlu Galaxy S25 Ultra əvvəlki performans testlərində təknüvəlidə 3 min 96, çoxnüvəlidə isə 9 min 80 bal toplaya bilib.
