Milyarder Elon Musk, ABŞ prezident seçkilərindən sonra Amerika siyasətində əsas oyunçu olmağa davam edəcəyini bildirir. Belə ki, bir çox analitik də Musk-ın seçkilərin ən böyük qalibi olduğunu iddia edir.
SpaceX, Tesla, X, Neuralink, xAI kimi şirkətlərin qurucusu və ya CEO-su olan, 264 milyard dollarlıq sərvəti ilə dünyanın ən zəngin insanı adını qazanan Elon Musk ABŞ prezident seçkilərində ən çox diqqət cəlb edən adlardan biri olub. Belə ki, Musk, X platformasında verdiyi açıqlamada, ABŞ siyasətinə olan marağının seçkidən sonrakı dövrdə də davam edəcəyini bildirib. Donald Trampın ən böyük dəstəkçilərindən biri kimi önə çıxan Musk, “Amerika PAC” adlı siyasi hərəkata maliyyə dəstəyi verərək və seçicilərin iştirakını təşviq edən kampaniyalar təşkil edərək, seçki prosesində mühüm fiqura çevrilmişdi.
Qeyd edək ki, ABŞ seçkiləri çərçivəsində Elon Musk, Trump-ın kampaniyasına ən azı 130 milyon dollar ianə edərək Trumpın ən böyük maliyyə dəstəkçilərindən birinə çevrilib. Əslində, o, America PAC vasitəsilə gündə 1 milyon dollarlıq bir hədiyyə kampaniyasına start vermişdi. Çərşənbə günü səhər Tesla səhmləri 12 faiz bahalaşaraq, şirkətin səhmlərini qaldırdı. Forbes-in məlumatına görə Donald Trump yenidən prezident seçildikdən sonra, dünyanın ən varlı adamı Elon Musk-a məxsus Tesla səhmlərinin qiymət artırımı ilə o, sərvətinə təxminən 20 milyard dollar əlavə etdi. Tesla-nın ilk gün bazar kapitalı artımı isə təqribi 96 milyard dollar oldu.
Ümumiyyətlə, Musk-ın bundan sonrakı dövrdə bir çox cəhətdən üstünlüklər əldə edəcəyi düşünülür. Belə ki, bunlara şirkətləri üçün azaldılmış tənzimləmələr, aşağı vergilər kimi bir çox üstünlüklər daxildir. Muskın biznes strategiyaları, xüsusilə Çindən asılılığı, SpaceX kimi layihələrinin ABŞ hərbi və kosmos siyasətindəki yeri etika və təhlükəsizlik baxımından mübahisələrə səbəb olur. Məsələn, Tesla istehsalı və Çin bazarı Musk üçün çox vacib sahələrdir. Bundan əlavə, Muskın Çinin Tayvanla bağlı diskursunu dəstəkləməsi və Rusiya prezidenti Vladimir Putinlə görüşləri onun ABŞ-ın xarici siyasətindən fərqli bir xətt izlədiyini göstərir.
