İstifadəçilərin şikayətləri və rəqiblərin yüksək performans verən çipsetlərdən istifadə etməsi, Samsung şirkətinin giriş və orta seqment modellərinin performansını xeyli artırmışdır. Koreya nəhənginin giriş səviyyəsi smartfonlarında son illər çatışmayan bir əsas şey qalıb. O da modelin ön tərəfdən 2-3 il əvvəlki cihazları xatırlatmasıdır. İstehsalçı qiymət çox artmasın deyə hələ də qalın çərçivəli IPS ekranlardan əl çəkmir. Bu gün qapalı anons edilən Galaxy A23 5G modeli də eyni problemdən əziyyət çəkir.
Galaxy A23 5G modeli nə vəd edir?
Smartfonun dizaynına baxdıqda arxa tərəf digər Galaxy A seriyası ilə tamamilə eyni dizayn malik qapaq və kamera modulunu görürük. Cihazın dizaynı barədə arxa tərəfə baxaraq heç bir mənfi rəy söyləyə bilmərik. Lakin ön tərəfə keçdikdə mövzü dəyişir. Çünki, 2022-ci il istehsalı bu modeldə qalın çənə qisminə, Infinity-V dizaynına (çıxıntılı selfi kamerası) sadiq ekran paneli görürük. Çənə qismini kənara qoysaq ən azından çıxıntılı selfi kamerası Infinity-o adı verilən nöqtə quruluşlu selfi kamerası ilə əvəzlənə bilərdi. Ümid edirik ki, Samsung firması növbəti illərdə bu problemi də həll edəcək. Əks halda performansı və texniki xüsusiyyətləri xeyli yaxşı olan Galaxy A23 5G kimi cihazlar alıcılar tərəfindən daha az seçiləcək.
Smartfonun texniki xüsusiyyətləri necədir?
Galaxy A23 5G modeli öz gücünü Snapdragon 695 5G çipsetindən alır. Bu çipset Redmi Note 11 Pro 5G modelində işlədilmiş çipsetin eynisidir. Performansı orta seqment üçün yaxşı səviyyədədir. Hətta bir çox Snapdragon 7XX seriyası çipsetin önündədir. Müqayisə üçün, Snapdragon 750G çipsetindən daha yüksək performans verdiyini qeyd edə bilərik.
Cihazın sevmədiyimiz 6.6 düymlük IPS LCD ekran panelinə sahibdir. Gorilla Glass 5 ilə qorunur. FHD+ təsvir ölçüsünə malikdir. Ekran görüntü yeniləmə tezliyi rəsmi mənbə tərəfindən göstərilməyib. Lakin 90Hz tezliyə malik olduğu deyilir. IPS LCD ekran paneli giriş səviyyəsi üçün qəbul edilən olsa da, qeyd etdiyimiz kimi çərçivələrin kiçilməsi çox əhəmiyyətlidir.
Samsung firması Galaxy A22 5G modelinə 50MP F/1.8 əsas , 5MP F/2.2 ultra-geniş bucaqlı və 2 ədəd 2MP təsvir ölçülü makro, dərinlik sensorları quraşdırıb. Əsas kamera OIS ilə gücləndirilib.
5000 mAs batareyası 25 Vt sürətli şarj dəstəkləyir. Android 12 üzərində OneUI 4.1 ilə qutudan çıxır. Smartfon bu gün Samsung tərəfindən heç bir təqdimat tədbiri keçirilmədən qapalı şəkildə rəsmi veb-səhifə üzərindən anons edilib. Ona görə qiymət barədə bir məlumat verə bilməyəcəyik. Təqribi olaraq 270-300$ səviyyələri arasında satışa çıxarılacağını təxmin edirik.
