Gələn ay uzun müddətdir iddialar və sızıntılarla gündəmdə olan Galaxy S23 seriyasını təqdim etməyə hazırlaşan Samsung, digər tərəfdən giriş və orta seqment modellərini nümayiş etdirməyə davam edir. Cənubi Koreya nəhəngi bu yaxınlarda 90 dollar qiymət etiketi ilə Galaxy F04 modelini təqdim etməyinin ardıyca, CES 2023 tədbiri ərəfəsində Galaxy A14 5G modelini bazara çıxarıb. Lakin smartfon heç bir təqdimat tədbiri olmadan qapalı formatda anons edilib. Bəs bu smartfon istifadəçilərə nə təklif edəcək?
Samsung Galaxy A14 5G xüsusiyyətləri
Samsung Galaxy A14 5G modeli 90 Hz yeniləmə sürəti təklif edən 6,6 düymlük FHD + IPS LCD paneli ilə istifadəçilərə təqdim olunur. Çox təəssüf ki, smartfon arxa tərəfin dizaynı cəhətdən unikallaşdırılsa da ön tərəfdə qalın çərçivəli ekran olduğu kimi qalır. Bundan əlavə, giriş seqmentində tez-tez istifadə edilən “infinty-u” konsepti bu cihazda davam etdirilir.
Cihazda istifadə olunan çipset haqqında ayrıca bəhs etmək lazımdır. Çünki, flaqman cihazlardakı ikili çipset strategiyası yavaş-yavaş orta seqmentə doğru irəliləyir. Şirkət smartfonun işlədiyi çipset barədə rəsmi açıqlama verməyib. Lakin keçmiş sızıntıları nəzərə alsaq, MediaTek Dimensity 700 ilə bu cihaz ABŞ-də, Exynos 1330 ilə Avropada təqdim olunacaq. Müxtəlif mənbələr tərəfindən verilən məlumata əsasən, Samsung şirkəti Amerika və Cənubi Koreya üçün orta seqmentdə Mediatek Dimensity çipsetlərindən istifadə edəcəyi halda, qlobal bazarda Exynos çipsetlərinə yönələcək. Təbii ki, bunun doğruluğunu bizə zaman göstərəcək.
Galaxy A14 5G modeli 4 GB RAM və 64 GB daxili yaddaşa malikdir. Eyni zamanda, yaddaşı artırmağa imkan verən microSD kart dəstəyi var. Smartfona 15 Vt dəstəkli 5000 mAs həcmində batareya quraşdırılmışdır.
Ön tərəfdə 13 MP selfi kamerası olduğu halda, arxa tərəfdə 50 MP əsas və 2 MP makro kameraları mövcuddur. Üçüncü kamera isə 2 MP dərinlik sensorudur ki, fiziki olaraq çəkilişlərdə əhəmiyyətli rola malik deyil. Eyni zamanda təhlükəsizlik üsulu kimi barmaq izi oxuyucusu güc düyməsinin üzərinə yerləşdirilir. Nəhayət, qeyd edək ki, o, Android 13 əsaslı cihaz One UI 5.0 ilə qutudan çıxacaq.
Modelin qiyməti
Samsung Galaxy A14 5G modeli ABŞ-də 199$ qiymətə təklif edilir. Cihazın ilkin satışı 12 yanvardan etibarən başlayacaq. Bundan əlavə, aprel ayında 229 avro qiymətlə Avropada rəflərdə yerini alacaq. O, yalnız ABŞ-də qara rəngdə, digər bazarlarda isə qara, gümüş, tünd qırmızı və açıq yaşıl rənglərdə satışa çıxarılacaq.
