Son dövrlərin ən böyük texnoloji inkişafı hesab edilən ChatGPT süni intellekt aləti təkmilləşməyə və əhatə dairəsini genişlətməyə davam edir. Belə ki, OpenAI şirkətinin ChatGPT süni intellekt aləti texnologiya tarixində ilk dəfə olaraq smartfona inteqrasiya ediləcək. Qeyd edək ki, Infinix brendinin yaxın günlərdə satışa çıxaracağı Note 30 seriyasının Folex rəqəmsal köməkçisinə ChatGPT süni intellekt aləti inteqrasiya ediləcək. Beləliklə son illərin sürətlə inkişaf edən texnologiyası ChatGPT artıq smartfon sahəsinə də daxil olur.
Xatırladaq ki, bir neçə gün əvvəl OpenAI şirkəti iOS cihazları üçün ChatGPT tətbiqini istifadəyə vermişdi. Belə ki, iOS əməliyyat sistemindən istifadə edən bütün modellərdə artıq ChatGPT tətbiqi yükləmək mümkün idi. Hətta bu xüsusiyyətin əlçatan olduğu ilk ölkələrdən biri də məhz Azərbaycan idi. İndi isə Infinix brendi yeni Note 30 seriyalı smartfonlar üçün ChatGPT süni intellekt çatbotunu əlçatan etmək istəyir. Bu məqsəd ilə də ilk dəfə olaraq ChatGPT smartfona inteqrasiya ediləcək. Qeyd edək ki, Folax rəqəmsal köməkçisi öz fəaliyyətini əvvəlki kimi davam etdirəcək. Lakin axtarış sistemi süni intellekt əsaslı Bing axtarış sisteminə oxşar nəticələr verəcək.
İnsayderlər ChatGPT süni intellekt alətinin smarfona inteqrasiyası ilə həm Note 30 modellərinin həm də Folex rəqəmsal köməkçisinin təkmilləşəcəyini bildirir. Hətta yenilənmiş Folex rəqəmsal köməkçisi Siri kimi rəqiblər ilə də rəqabətə girə biləcək. Hələlik süni intellekt çatbotunun Note 30 seriyasının hansı modellərinə inteqrasiya ediləcəyi məlum deyil.
