Son günlərdə süni intellekt əsaslı bir çox cihaz təqdim edilib, lakin bu dəfə təqdim edilən cihaz süni intellekt dəstəkləyən bir qulaqlıqdır. Belə ki, Honq-Konqdan olan Wooaѕk Technology özünün ChatGPT dəstəkli ilk qulaqlıq modeli ТrаnѕВudѕ А8-i təqdim edib. OpenAI-nin ChatGPT aləti vasitəsi ilə yeni qulaqlıq başqa dildə danışan həmsöhbətin danışıqlarını real zamanda tərcümə edir.
Xatırladaq ki, ötən günlərdə OpenAI real zamanda tərcümə ilə bağlı olduqca iddialı yeniliklərini təqdim etmişdi. Belə ki, GPT-4o ilə birlikdə artıq bir çox tərcümə proqramlarına ehtiyac aradan qalxacaq düşüncəsi də yaranmışdı. Qeyd edək ki, ChatGPT dəstəkli bu qulaqlıq ümumilikdə 144 dili və 70 dialekti dəstəkləyir ki, bu da istifadəçilərə dünyanın əksər yerində insanları başa düşməyə kömək edir. Tərcümə birbaşa istifadəçinin qulağında baş verir və ayrılıqda qulaqlıq ilə birlikdə verilən ekrana sahib kiçik cihazda mətn kimi əks olunur. Maraqlısı budur ki, tərcümə gecikməsi sadəcə 0.5 saniyədir və dəqiqlik 98%-ə bərabərdir.
Qulaqlıqdakı ChatGPT, tərcümə köməkçisi ilə yanaşı həm də, səsli köməkçi ola bilir. Qulaqlığa barmağınızla iki dəfə toxunsanız, söhbət robotu açılır və buradan istədiyiniz məlumatı köməkçinizə verə bilərsiniz. Lakin bu funksiyanın əlçatan olması üçün qulaqlıq hər hansı mobil şəbəkəyə və ya Wi-Fi şəbəkəsinə qoşulu olmalıdır. Yeni qulaqlıq tərcümə rejimində 5 saat, normal rejimdə isə 35 saat işləyə bilər. Hazırda cihaz 179 dollar qiymət etiketi ilə satışdadır.
