Apple brendinin bu il təqdim edilməsi planlaşdırılan iPhone modelləri ilə bağlı məlumatlar yavaş-yavaş gün üzüünə çıxır. Belə ki, ötən günlərdə texnologiya nəhənginin yeni flaqman iPhone 16 seriyasında iPhone X və iPhone 11 modellərindəki kamera modulu dizaynlarına bənzər dizayndan istifadə ediləcəyi iddia olunmuşdu. İndi isə Apple şirkətinin yeni nəsil, başqa sözlə desək 4-cü nəsil iPhone SE modelinin dizaynı bəlli olub.
Apple brendi iPhone SE seriyasını yenidən canlandırmaq niyyətindədir. Belə ki, ötən ilin sonlarında 4-cü nəsil iPhone SE modelinin iPhone 14 batareyasına sahib olacağı barədə məlumat ortaya çıxmışdı. Hətta əvvəllər, iPhone XR modelinə bənzər dizayna sahib olacaq yeni modelin bəzi görüntüləri də sızdırılmışdı. İndi isə ortaya çıxıb ki, Apple brendinin yeni nəsil iPhone SE modelinin dizaynı çərtiksiz ekran modelinə əsaslanacaq. Apple ilk dəfə olaraq SE seriyasında dinamik ada ekran dizaynından istifadə edəcək. iPhone 14 Pro seriyası ilə həyatımıza daxil olan bu ekran dizaynı olduqca yeni hesab olunur.
Görünən odur ki, yeni nəsil iPhone SE müasir iPhone dizaynını mənimsəyərək tək ekran ilə təchiz ediləcək. Məhz yeni ortaya çıxan görüntülərin ötən gün qarşımıza çıxan iPhone 16 seriyasının sızdırılmış dizayn görüntüləri ilə oxşarlığı da diqqət çəkib. Lakin onu da qeyd etmək lazımdır ki, yeni nəsil SE modeli 2025-ci ildə yəni, yeni iPhone 16 seriyası təqdim edildikdən sonra gələ bilər.
