Apple şirkətinin təqdim etdiyi Vision Pro satışa çıxarıldıqdan sonra sosial şəbəkələrdə sürətlə viral olmağı bacarmışdı. Təbii ki, istifadəçilərin əksəriyyəti yeni qarışıq reallıq eynəyini bəyənsə də, bir çoxları da onun batareya tərəfində zəif performansa sahib olduğunu iddia edir. Məşhur analitik Mark Gurman-a görə, Apple Vision Pro modeli hələ ən azı 4 nəsil sonra öz ideal vəziyyətinə çata biləcək.
Qeyd edək ki, Mark Gurman məlumatı şirkət daxilindəki “Vision Products Group” üzərindən əldə etdiyini bildirib. Hazırda gələcək vəd edən bu model sadəcə bir neçə ildən sonra şirkətin digər məhsulları kimi tam hazır olacaq və ya başqa sözlə yetkinləşəcək. Ümumiyyətlə Apple brendi Vision Pro-nu inqilabi yenilik hesab edir. Şirkət ilk iPhone modelini təqdim etdikdə də eyni ifadələrdən istifadə etmişdi. Əgər biz ilk iPhone modelinə və sonuncu flaqman iPhone 15 modelinə nəzər salsaq bu smartfonlar arasındakı fərqin illər ərzində hansı sürətdə inkişaf etdiyini görə bilərik. Məhz eyni fərq də şirkətin gələcəkdə təqdim edəcəyi yeni Vision Pro modellərində yaranacaq.
5-6 ildən sonra Vision Pro ideal vəziyyətdə olacaq və böyük ehtimalla bir çox Apple məhsullarını əvəz edəcək. Qurmanın sözlərinə görə, hətta iPhone-ları əvəz etməyə köklənən bu cihaz dərhal olmasa da, iPad-ləri əvəz etmək potensialına malikdir. OpenAI-nin baş direktoru Sam Altman daha əvvəl Vision Pro-nu gündəmə gətirmişdi. Təəccüblü deyil ki, Apple-ın 3500 dollarlıq yeni qulaqlıqlarını fiziki olaraq sınamaq şansı qazanan Altman, yalnız ABŞ-da mövcud olan Vision Pro modelinin iPhone-un 2007-ci ildə səhnəyə çıxmasından sonra gördüyü ən təsirli ikinci texnologiya olduğunu bildirmişdi.
