Apple şirkəti illərdir öz mobil cihazlarında öz texnologiyalarından istifadəyə maraqlı olsa da şəbəkə modemi cəhətdən heç də bəxti gətirmir. Belə ki, Apple şirkəti iPhone-larda istifadə olunacaq modem çiplərinin tədarükü üçün Qualcomm ilə müqaviləsini 2026-cı ilə qədər uzatmalı olub. Sözügedən addım Apple-ın öz şəbəkə modemlərini istehsal etmək planlarının gözləniləndən daha uzun sürəcəyini göstərir.
Smartfon dünyasında ən qəliz məsələ məhz modem dediyimiz rabitə çipinin hazırlanmasıdır. Bir məsələ var ki, əlaqə yaratmağa imkan verən bu çiplər Huawei, Nokia, Qualcomm kimi illərdir bu sahədə olan nəhənglər tərəfindən detallı patentləşdiriliblər. Buna görə də Apple öz modem işini yekunlaşdırmaqda çətinlik çəkir.
Hazırda Qualcomm tərəfindən hazırlanmış 5G modemini istifadə edən və hər modem üçün əhəmiyyətli məbləğdə pul ödəyən Apple, bir neçə il əvvəl Intel-in şəbəkə modemləri bölümünü almışdı. Lakin bu günə qədər heç bir aktiv məhsul təqdim edə bilməyib.
Yeni müqaviləyə əsasən, ABŞ-ın yarımkeçirici nəhəngi Qualcomm 2024, 2025 və 2026-cı illərdə Snapdragon 5G modem sistemlərini Apple-a tədarük edəcək. Başqa sözlə, şərti adla iPhone 18-ə qədər modemlər Qualcomm-dan gələcək. Müqavilənin maliyyə təfərrüatları ilə bağlı açıqlama verilməsə də, 2019-cu ildə imzalanmış əvvəlki müqavilə ilə oxşar şərtlərdə olduğu bildirilir. Hesabatlar göstərir ki, Qualcomm-un sahib olduğu patentlər belə Apple-ın texnologiyaları ilə əhəmiyyətli şəkildə üst-üstə düşür. Bu patentlərin buraxılması üçün isə 2029-2030-cu illərə qədər gözləmək lazımdır.
