Bloomberg mənbəsinin məlumatına görə, Apple iPad modelləri üçün yuxarı və aşağı hərəkət edən, eləcə də 360 dərəcə fırlana bilən robot qol hazırlayır. Mark Gurman-a görə, şirkət bir neçə yüz nəfərlik komanda ilə işini davam etdirir.
Bundan əlavə, bu stolüstü qurğu insanlara öz ağıllı evlərini idarə etməyə, videokonfranslarda iştirak etməyə, ev təhlükəsizliyinə nəzarət etməyə və bir çox başqa funksiyalara sahib olmağa imkan verəcək. Gurman, bundan əvvəl bir neçə dəfə bildirmişdi ki, Apple ev robotları üzərində işləyir. İndi o, layihənin Apple-ın texnologiya üzrə vitse-prezidenti Kevin Lynch-in rəhbərliyi altında davam etdiyini iddia edir. Maraqlısı budur ki, iPad üçün nəzərdə tutulan yeni robot qol, 2026 və ya 2027-ci ildə təqdim edilə bilər. Hətta onun qiyməti barədə də iddialar yüksəlməyə başlayıb. Analitiklərə görə bu qurğu sadəcə 1000 dollara təklif olunacaq.
Cihazın, Siri və ya Apple Intelligence-dən “mənə bax” kimi əmrlərə cavab vermək və video zəng zamanı ekranı istifadəçiyə çevirmək kimi bacarıqlarının olacağı bildirilir. Bloomberg-in məlumatına görə, Apple hazırda iPadOS-un fərdiləşdirilmiş versiyası ilə işləyən modelləri sınaqdan keçirir. Beləliklə, Apple, söz-söhbətə çevrilən avtomobil layihəsinin ləğvindən və bu ilin əvvəlində Vision Pro-nun satışa çıxarılmasından sonra ilk böyük layihəsi ilə gündəmə gəlir.
